මේ දිනවල සාර්ථකව තිරගත වන “ෆේස්ටු ෆේස්” චිත්‍රපටයේ භාග්‍යාගේ චරිතය නිරූපණය කරන ශෙහානි පෙරේරා නවක රංගන ශිල්පිනියක්. ජනප්‍රිය රංගන ශිල්පිනි උදාරි පෙරේරාගේ නැඟණිය වන ශෙහානිගෙ අලුත්ම තොරතුරු දැනගන්න අපි ඇයට කතා කළා.
ශෙහානි ඔබ අද සිනමාවේ තාරකාවියක් වී හමාරයි. ඒ ගැන මොකද හිතෙන්නේ?
මගේ පළමු චිත්‍රපටය ‘ෆේස් ටු ෆේස්’ චිත්‍රපටය. එහි අධ්‍යක්‍ෂ හර්ෂ උඩකන්ද අලුත් මුහුණක් හොයලා තියෙනවා භාග්‍යා චරිතයට. ඉතින් ඒ චිත්‍රපටයට සම්බන්ධ වීමට මට අවස්ථාව උදා වුණේ අනුජ් රණසිංහ අයියා හරහා තමයි.
‘ෆේස් ටු ෆේස්’ හරහා අද ඔබව දකින විට භාග්‍යා ගැන මොකද හිතෙන්නේ?
ඇත්තටම ගොඩාක් සතුටුයි. ‘ෆේස් ටු ෆේස්’ මගේ සිහිනය සැබෑ කළා. මම කැමරාවට අලුත්. මට චරිතය ගොඩනඟා ගැනීමට හර්ෂ අයියා ඇතුළු ගොඩ දෙනෙක් උදවු කළා. බලපු ගොඩදෙනෙක් දක්වපු ප්‍රතිචාරය තමයි මගේ මේ පළමු චිත්‍රපටය කියලා කියන්න අමාරුයි කියලා. ඒ තරමට මම හොඳට රඟපාලා තියෙනවා.
අද සමාජයේ නිර්දෝෂි කෙනාට වඩා වැරැදි කරුට උදවු කරන්නේ. ඔබ ඒ කරපු දේ හරිද?
මම ඒ කරපු දේ හරි නැහැ තමයි. නමුත් මගේ චරිතය අනුව මට එය කරන්න සිද්ධ වුණා. එය මට වෙනස් කරන්න බැහැනේ ඉතින්. හරි කෙනාව මට තේරුම් ගන්න බැරි වුණා. වැරැදි කෙනාට තමයි මම උදවු කරලා තියෙන්නේ.
සැබෑ ජීවිතයේදීත් ඔබට මෙවැනි අවස්ථාවන්වලට මුහුණපාන්න සිදුවෙලා තිබෙනවද?
මෙහෙමයි. සැබෑ ජීවිතයේදී අපි සමඟ ගැටෙන මිනිසුන් වෙස් මුහුණු දාගෙන තමයි ඉන්නේ. මිනිසුන් තේරුම් ගන්න අපහසුයි. ඒත් මට එහෙම ප්‍රශ්න මතුවෙලා නැහැ. නමුත් මිනිසුන් තේරුම් අරගෙන අතේ දුරින් ආශ්‍රය කළාම හැම දේටම හොඳයි කියලා මම හිතනවා.
අපේ ආදරණීය සහෝදරියක් මේ ක්‍ෂේත්‍රයේ ජනප්‍රිය රංගන ශිල්පිනියක්. ඇය උදාරි පෙරේරා. අක්කා නඟෝ දෙන්නාම ඉදිරියේදී අපට දැකගන්න පුළුවන් වෙයි?
අපි අතර එහෙම කිසිම තරගයක් නැහැ. අක්කා ෆේස් ටු ෆේස් නරඹලා ගොඩාක් සතුටු වුණා. අනෙක මම මේ ක්‍ෂේත්‍රයට අලුත්. මට අක්ක සමඟ තරග කරන්න බැහැ. අක්කාගෙන් මට ඉගෙන ගන්න ගොඩාක් දේවල් තිබෙනවා. නිර්මාණයකින් මට ආරාධනා කළත් මම ඒ ගැන මුලින්ම කියන්නේ අක්කාට. එවැනි බැඳීමක් තියෙන කොට අපි ඇයි තරග වදින්නේ.
දැනට විකාශය වන ජනප්‍රිය ටෙලි නාට්‍යවල සුවිශේෂී චරිත මඟහැරියේ ෆේස් ටු ෆේස් නිසාමද?
ඇත්තටම මම ජනප්‍රියම ටෙලිනාට්‍යවල සුවිශේෂී චරිතවලින් ආරාධනා ලැබුණා. සමහර දේවල් ෆේස් ටු ෆේස් රූපගත කිරීම් නිසා සම්බන්ධ වෙන්න බැරි වුණා. මම තවත් සමහර නිර්මාණ ප්‍රතික්‍ෂේප කළේ ෆේස් ටු ෆේස් එනකම් මඟ බලාගෙන හිටිය නිසයි.
‘ෆේස් ටු ෆේස්’ එකෙන් හමුවුණු ඔබ මීළඟට හමුවෙන්නෙ?
නාලක විතානගේ අධ්‍යක්‍ෂණය කරන කැලුම් ආර්යයන් නිෂ්පාදනය කරන ඊතලය චිත්‍රපටයෙන් මම දැකබලා ගන්න පුළුවන්. එය වෙනස්ම විදියේ චරිතයක්.
වෙනස්ම විදියේ චරිතයක් කියලා අදහස් කළේ?
මෙහෙමයි. ෆේස් ටු ෆේස් එකේ මම කරන්නේ මාධ්‍යවේදිනියකගේ චරිතයක්. නමුත් ඊතලය චිත්‍රපටයේ මම ප්‍රධාන චරිතයක් රඟපානවා. පෙම්වතියගේ චරිතය චරිත දෙක අතර ලොකු වෙනසක් තිබෙනවා. පෙම්වතියගේ චරිතය රඟපාන්න අසීරු කටයුත්තක් වුණා. නාලක අයියා පෙර පුහුණුවීම දර්ශන සිදුකරලා තමයි රූපගත කිරීම් සිදුකළේ. හැම දේම කියලා දීලා නිදහසේ මට රඟපාන්න දුන්නා.
