ඇල්බේනියාවේ සිදුවූ භූමිකම්පාවෙන් මියගිය දරුවෙකුගේ සිරුර අසළ සිට හඬා වැටෙන සුනඛ සුරතලෙකුගේ ඡායාරූපයක් වෙත මේ වනවිට මුළු ලෝකයේම අවධානය යොමු වී තිබෙනවා.
දුටුවන්ගේ හද සසල කරවන මෙම ඡායාරූපය ඊයේ දිනයේදී ලොව පුරා සමාජ මාධ්‍යවල හුවමාරු වනු දක්නට ලැබුණා.
ඇල්බේනියාවේ මෙම භූකම්පනය හේතුවෙන් විශාල පිරිසක් අවතැන්ව සිටින බව විදෙස් මාධ්‍ය වාර්තා කළා.
රික්ටර් මාපක 6.4ක මෙම භූකම්පනයෙන් 22කට අධික පිරිසක් ගොඩනැගිලි සුන්බුන් අතර රැඳි සිටින අතර තුවාල ලැබූවන් 600 ඉක්මවා තිබෙනවා.
ඒ අතරතුර තුමානා හා ඩුරෙස්හි භූකම්පන සිදුවූ ස්ථානවලදී ලබාගත් ඡායාරූප බොහෝමයක් සමාජ මාධ්‍ය තුළ හුවමාරු වුණා.
කෙසේ වෙතත්, එම ඡායාරූප අතරින් බොහෝ දෙනාගේ අවධානය දිනාගැනීමට සමත්ව ඇත්තේ තම ස්වාමියා අසළ සිට හඬන සුනඛ සුරතලාගේ සේයාරුවයි.
ඊට අමතරව මිනිසෙක් හා දරුවෙක් හඬා වැටෙන අයුරු දැක්වෙන ඡායාරූප ද්විත්වයක්ද දැකගත හැකිවුණා.
