ඉන්ධන මිල ඉහළ දැමීමට කටයුතු කළේ මෙරට මූල්‍ය ස්ථාවරය වෙත බලපෑමක් ඇතිවීම වැළැක්වීමට යැයි මුදල් රාජ්‍ය ඇමැති අජිත් නිවාඩ් කබ්රාල් මහතා සඳහන් කරයි.
ඉදිරියේ ඇති අවදානම ශ්‍රී ලංකා මහ බැංකුව විසින් රජයට පෙන්වා දීම හේතුවෙන් මෙම තීරණය ගැනීමට සිදු වූ බවද ඒ මහතා පැවසීය.
කෙසේ වුවද දැනට ද ලොව බොහෝ රටවල ඉන්ධන මිල ඇත්තේ ශ්‍රී ලංකාවට වඩා ඉහළ තැනක යයිද ඒ මහතා සඳහන් කළේය.
ලෝකයේ බොරතෙල් මිල පහළ ගිය හොත් එම මුදල මිල ස්ථායිකරණ අරමුදලකට බැර කළ හැකි බවට මහ බැංකුව නිර්දේශ කර ඇති බවද පැවසූ ඔහු මිල ස්ථායිකරණ සඳහා විශේෂ අරමුදලක් ඉදිරියේදී පිහිටුවන බවද ඔහු කියා සිටියේය.
තෙල් සංස්ථාව ලබා ඇති පාඩුව ප්‍රධාන බැංකු දෙක හරහා ශ්‍රී ලංකා මහ බැංකුවට ද බලපෑම් ඇති කර තිබෙන බවද කී මුදල් රාජ්‍ය ඇමැති වරයා එය රටේ ණය අනුපාතයට ද බරපතළ ලෙස බලපානු ඇතැයිද කියා සිටියේය.
