සංචරණ සීමා ක්‍රියාත්මක වුවද බහුතරයක් පුද්ගලයන් එම සීමා අනුගමනය නොකරන බවත්, බළධාරීන් විසින් විටින් විට ගන්නා තීන්දු තීරණ හරහා බොහෝදෙනාට සංචරණ සීමා නොතකා සමාජයේ නිදහසේ සැරිසැරීමට අවස්ථාව ලැබී ඇති බවත් ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය පෙන්වා දෙනවා. එම සංගමයේ සභාපති උපුල් රෝහණ මහතා පවසන්නේ මේ වනවිට සංචරණ සීමා පැනවීම විහිළුවක් බවට පත්ව ඇති බවයි.
මතුව ඇති තත්වය සම්බන්ධයෙන් සම්පූර්ණයෙන්ම වගකිව යුත්තේ තීන්දු තීරණ ගන්නා නිළධාරීන් බවයි ඔහු වැඩිදුරටත් පවසන්නේ. ජනතාවට රිසේ සේ සමාජයේ හැසිරීමට අවස්ථාව ලබා දෙන්නේ නම් එහි වගකීම නිළධාරීන් විසින් බාරගත යුතු බවත්, ජනතාවට දොස් පැවරීම නිවැරදි නොවන බවත් ඔහු සඳහන් කරනවා.
මෙවැනි ආකාරයෙන් සංචරණ සීමා ක්‍රියාත්මක වන්නේ නම් කොරෝනා වසංගතය කිසිසේත්ම පාලනය කළ නොහැකි බවද උපුල් රෝහණ මහතා පවසනවා.
එසේ තිබියදී ජුනි 21 වැනිදා රට විවෘත කිරීමේ සූදානමක් පවතින බවට ජනතාව අතර මතයක් පැතිර යන බව පෙන්වා දෙන උපුල් රෝහණ මහතා පවසන්නේ රට යළි විවෘත කරන්නේ නම් දැඩි නීති රීති යටතේ රට යළි විවෘත කළයුතු බවයි.
සිංහල අවුරුදු සමයෙන් පසු උත්සන්න වූ වසංගත තත්වය තවමත් පාලනය කර ගැනීමට නොහැකි වී ඇති බවත්, ආසාදිතයන් වාර්තා වීම යම් ප්‍රමාණයකින් අඩු වී ඇති නමුත් එය සංචරණ සීමා පැනවීමෙන් බලාපොරොත්තු වූ ප්‍රතිඵලය නොවන බවත් ඔහු අවධාරණය කරනවා.
