සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
මහින්ද රාජපක්‍ෂ ගේ බාල පුත්‍රයා වන රෝහිත රාජපක්‍ෂ මැදිහත්වී සිදුකළ සුප්‍රීම් සැට් චන්ද්‍රිකා ව්‍යාපෘතිය සඳහා Avatar චිත්‍රපටය නිෂ්පාදනය කිරීමට සමාන විශාල ජාතික ධනයක් වැය කළ බවට ජාතික ජනබලවේගය පක්ෂයේ පාර්ලිමේන්තු මන්ත්‍රී ජගත් මනුවර්ණ සිදුකළ ප්‍රකාශයක් මේ වන විට සමාජ මාධ්‍ය තුළ හාස්‍යට ලක්වෙමින් තිබේ.
ප්‍රසිද්ධ youtube නාලිකාවක් සමඟ සිදුකරන දේශපාලන සම්මුඛ සාකච්ඡාවකදී ජගත් මනුවර්ණ මේ අදහස් දැක්වීම සිදුකර තිබේ.
එහිදී ඔහු සඳහන් කරනුයේ, ” ෆේස්බුක් එකේ දාලා තිබුණා චිචී රොකට් එක යවන්න ගිය බජට් එකයි, Avatar හදන්න ගිය බජට් එකයි එකයි කියලා.”යනුවෙනි.
“Avatar චිත්‍රපටය කොතරම් ධනයක් උත්පාදනය කරනවද ? ඒත් එක මිනිහෙක් ගේ විනෝදාස්වාදය සඳහා රටේ ජාතික ධනයෙන් විශාල ප්‍රමාණයක් නාස්ති කරලද ? ” යනුවෙන් එහිදී ජගත් මනුවර්ණ ප්‍රශ්න කරන අතර වැඩිදුරටත් ඔහු පවසන්නේ චිත්‍රපට , ටෙලිනාට්‍ය වැනි නිර්මාණ ජාත්‍යන්තර තලයට ගෙනයාමට අවශ්‍ය තරම් නිෂ්පාදන පිරිවැයක් දැරීමට මූල ධනයක් තබා සාමාන්‍ය ටෙලිනාට්‍යක් නිෂ්පාදනය කිරීමත් දුෂ්කර බවයි.
කෙසේවෙතත් මේ ප්‍රකාශ මේ වන විට හාස්‍යට ලක්වෙමින් තිබෙන්නේ අද (06) පාර්ලිමේන්තුවේදී අගමැති හරිනි අමරසූරිය සිදුකළ අනාවරණයක් නිසාය.
පාර්ලිමේන්තු මන්ත්‍රී ඩී.වී. චානක ගේ ප්‍රශ්නයකට අගමැතිවරිය දුන් පිළිතුර අනූව, “සුප්‍රීම් සැට් චන්ද්‍රිකාව වෙනුවෙන් ශ්‍රී ලංකා රජය රුපියලක්වත් වියදම් කර නැත. එම ව්‍යාපෘතිය තවමත් ක්‍රියාත්මක අතර එය වර්ෂ 2015 වසරේ සිට මේ දක්වා ශ්‍රී ලංකාවට ආදායම් උපදවා තිබේ. ඒ අනුව වර්ෂ 2022 වසරේ පමණක් සුප්‍රීම් සැට් චන්ද්‍රිකාවෙන් ශ්‍රී ලංකාවට කෝටි 8,778 ක් (ලක්ෂ 877,800) ආදායම් උපයා ඇත.
මේ සමඟ සුප්‍රීම් සැට් චන්ද්‍රිකාව සම්බන්ධවූ ජවිපෙ ඇතුලු පාර්ශ්ව ගෙනගිය ප්‍රචාර සියල්ල අසත්‍ය බවට පත්වන අතර මෙවැනි අසත්‍ය ප්‍රකාශ රැසක් හරහා සිදුකළ මාධ්‍ය ක්‍රියාන්විත මඟින් ජනතාව රැවටීමට ලක්කිරීම වත්මන් ජාතික ජනබලවේගය ආණ්ඩුව පිහිටුවාලීමට ඉවහල් වූ බවට සමාජ මාධ්‍ය තුළ ප්‍රතිචාර දැක්වෙමින් තිබේ.
