2020 නව වර්ෂය ආරම්භයත් සමඟ සියලු සුබ වැඩවලට යහපත් දිනයක් 2020 ජනවාරි 08 බදාදා උදා වෙයි. මෙම දිනයේ අලුතින් සෑදූ නිවාසවලට පදිංචියට යෑමටද, නව වසරේ අලුතින් රැකියාවක් භාර ගැනීමටද, කුඩා ළමයින්ගේ හිසකෙස් කැපීමටද, අලුතින් ව්‍යාපාරයක් පටන් ගැනීමටද, තරග විභාගවලට පෙනී සිටීමටද, මුදල් යොදා කරන වැඩ කටයුතුවලටද, අලුතින් ළිං කැපීමටද ඉතාම යහපත්ය.
මෙදින පුර පක්ෂයේ දවසක් වීමද, සඳු වෘෂභයේ උච්චව සිටීමද යහපත්ය. මෙදින පෙරවරු 9.27ට මෙම සුබ වෙලාව උදා වන්නේය. සුබ දිශාව වනුයේ උතුරයි. මෙම වෙලාවට උදා වන තත්කාල ලග්නය අනුව රවි, ගුරු, ශනි, බුධ 11 වැන්නේ සිටීම ඉතාම සුබදායකය. රවි 11 වැන්නේ සිටීම මත සියලු දෝෂ භංග වන බව කියා ඇත.
එසේම පුර සඳු කේන්ද්‍ර ස්ථානයක් වන 04 වැන්නේ පූර්ණ බල සහිතව සිටීමද ඉතාම යහපත්ය. මෙදින බදාදා දිනයක් වීමද රෙහෙණ නැකැත පැවැතීමද නිසා “සුබ” නම් මහා බලගතු යෝගයද ඇත.
එනිසා 2020 ජනවාරි 08 බදාදා දින පෙරවරු 9.27ට උතුර බලා කරන සියලු සුබ කටයුතුවලින් යහපත් ප්‍රතිඵල ලැබෙයි. තමන්ගේ උපන් නැකැතට මෙම දිනය සුබ විය යුතුය. එනිසා ජ්‍යොතිර් වේදියකුගේ උපදෙස් මත තමාගේ ජන්ම නැකැතට මෙම දිනය ගැළපෙනවාදැයි දැන ගන්න.
