රුව ඇති දුවක යනු පවුලට වාසනාවකි. ගුණ ගරුක දුවක යනු පවුලට නිධානයකි. රුවත්, ගුණත් සියල්ල ලද දුවක යනු පවුලට සිරිදුවකි. දිනක්ෂි ද එවන් වූ වාසනාවන්ත සිරිදුවකි. සත්තකින්ම කියනවා නම් දිනක්ෂි, ප්‍රියසාද් පවුලට සතුට අස්වැසිල්ල ගෙන ආ අපූරු කෙල්ලකි. රංගනවේදිනියක නොව, තම ලොකු දුව හැටියට දිනක්ෂි ගැන කතා කරන්න ‘හාට්’ පිළිසඳරට පැමිණියේ ඇගේ දයාබර අම්මා ශිරාණි ප්‍රියසාද්ය.
ලොකු දුව හැටියට දිනක්ෂි පවුලට ඉතා ළැදි බවයි ආරංචිය?
ඇත්තටම ඔව්…, දිනක්ෂි කියන්නේ උණුවන හිතක් තියෙන වැඩිහිටියන්ට ගරු කරන පවුලට ගොඩාක් ළැදි දුවක්. ඒ වගේම අක්කා කෙනකු හැටියට නංගිලාටත්, ඇගේ නෑ හිතවතුනට වාගෙම අනෙකුත් වැඩිහිටියන්ටත් දිනක්ෂි දක්වන ඇල්ම හරිම පුදුමාකාරයි.
පුංචි කෙල්ලක කාලේ නම් දිනක්ෂි දඟයිලු නේද?
පුංචි කාලේ කවුද ඉතින් දඟ නැත්තේ. දිනක්ෂිත් ටිකක් දඟයි. හැබැයි ඒ කොච්චර සෙල්ලක්කාර වුණත් දිනක්ෂි පුංචි කෙල්ලක කාලේ ඉඳන්ම පුංචි පුංචි වගකීම් හිතට ගත්තා. ඒවා හරියටම ඉටු කළා. විශේෂයෙන්ම ශේෂාද්‍රි පුංචි කාලේ නර්සරි යන දවස්වල එයා පස්සෙන් හිටියේ මම නෙවෙයි. දිනක්ෂි තමයි එයාගේ නංගිව පන්තියට එක්කන් ගියේ. නංගියව පන්තියේ ඉන්දවලා බෑග්, බෝතල් එල්ලලා අක්ක ඉන්නව බය වෙන්න එපා හොඳේ’ කියලා නංගිගේ ඔළුව අතගාලා තමයි දිනක්ෂි එයාගේ පන්තියට ගියේ. පාසලේදී මොනවා හරි වැඩකදී වුණත් ටීචර්ස්ලා, ලීඩර් කරගත්තේ දිනක්ෂිව. පන්තියේ මොනවට හරි සල්ලි එකතු කරනකොට ඒ මුදල් භාරව හිටියේ දිනක්ෂි. අවශ්‍ය ගනුදෙනු ඉවර වුණාට පස්සෙ ඉතුරු සල්ලි බේරන්නෙත් දිනක්ෂි. පිළිවෙළ, වගකීම කියන එක ළඟ හරි අපූරුවට තිබුණා.
තවමත් ඒ වගකීම් සහිත පැවැත්ම දිනක්ෂි ළඟ තියෙනවද?
අපොයි ඔව්. ටෙලිනාට්‍ය රූ ගතකිරීම්වලදී ඈ කවදාවත් කාවවත් පීඩාවට පත්කළේ නැහැ. වේලාවට සෙට් එකට යනවා. දිනයක්, වෙලාවක් වෙනස් කරන්නේ නැහැ. කිසිම කෙනෙක් එක්ක ගැටලුවක් ඇතිකර ගත්තෙත් නැහැ.
දිනක්ෂිගේ ජනප්‍රියත්වයේ රහස එයද?
සමහර විට වෙන්න ඇති. ඒ වගේම දිනක්ෂි කා එක්කත් හරිම සුහදයි. දිනක්ෂි එක්ක වැඩ කරන්න හරි පහසු බවයි හැමෝම වාගේ කියන්නේ. මගේ දුව ගැන කවුරුත් එහෙම කියනවා ඇහෙන කොට අම්මා හැටියට මගේ සිතට දැනෙන සතුට අප්‍රමාණයි.
කාගෙවත් හිත රිදවන්නවත් දිනක්ෂි හරිම අකැමැතියිලු නේද?
ඔව්, දින ගණන් වෙන්කර ගන්න බැරි සමහර ටෙලි ඩ්‍රාමාවල තිරපිටපත අතට ආවම දුව මගේ පස්සෙම දැවටි දැවටි අහනවා. අනේ අම්මා කොහොමද මේක අතාරින්නේ. බැහැ කිව්වොත් එයාලගේ හිත රිදෙයි නේද කියකියාම තැවෙනවා. ඒ වාගේම කොහොම කොහොම හරි එයට අවශ්‍ය ඉඩ හදා ගන්නවා.
තිර පිටපතක් ලැබුණාම දිනක්ෂි තවමත් මවුපියන්ගේ කැමැත්ත විමසනවා කියන්නෙ ඇත්තද?
ඔව්. දුව තවමත් අපෙන් අහනවා. මේක භාර ගත්තට කමක් නැහැ නේද අම්මා කියලා. ඒ වගේම තමා මොකක් හෝ විශේෂ යමකට අත ලිහන්නට කලින් වුණත් දිනක්ෂි අපේ අවසරය තවමත් විමසනවා.
ටෙලි නිර්මාණ භාර ගන්න විට ඔබ දිනක්ෂිට වාරණ පනවන තැන් තියෙනවද?
වාරණ කියන වචනය ඒ තැනට සුදුසු නැහැ. තරුණ දුවකගේ අම්මා කෙනකු වශයෙන් මම යම් චරිත ගැන ඈ හා කතාබහ කරනවා. එතැන තිබෙන්නේ සුහද බව හෝ බැඳීම මිස නීති රීති නෙවෙයි.
දිනක්ෂි ෆීල්ඞ් එකට ආව මුල් දවස්වල එවැන්නක් සිදුවුණාලු නේද?
ඒ කාලේ දිනක්ෂි පොඩි කෙල්ලක්නේ. ඒ හින්දා එහෙම යම් දේ අපට තෝරා දෙන්න සිදුවුණා.
අද දිනක්ෂි සිටින තැන ගැන ඔබ බොහෝ තෘප්තිමත්?
ඒ ගැන කියන්න ඇත්තෙන්ම වචන නැහැ. මගේ ලොකු දුව ගැන සත්තකින් මම හරිම තෘප්තිමත්. මඟතොටේ යනකොට සාප්පුවකට ගොඩවන විට දිනක්ෂිට ලැබෙන ආදරණීය ප්‍රතිචාර මට හරිම අහිංසක අභිමානයක්.
එය දිනක්ෂිට කරදරයක් වූ අවස්ථා තිබෙනවද?
ප්‍රේක්‍ෂක ප්‍රතිචාර දිනක්ෂි කරදරයක් විදියට හිතන්නේ නැහැ. ඈ ඔවුන් හා හරිම සුහදව තමා හැසිරෙන්නේ. අත්සනක් ගහන්න සෙල්ෆියක් ගන්න දිනක්ෂි ඉදිරිපත් වෙන්නේ ඉතාම නිහතමානීවයි.
දිනක්ෂි වැඩියෙන්ම බය අම්මටද, තාත්තටද?
මට තමයි බය. තාත්තා එක්ක හරි හුරතලේ. දූලා ඉතින් කොහොමත් තාත්තලා එක්ක යාළුයිනේ. මම තමයි එයාලට සැරට ඉන්නේ.
පුංචි කාලේ වාගේම දිනක්ෂි නංගිලා එක්ක තවමත් සමීපයිද?
අපොයි ඔව්. විවේකයක් ලැබුණු හැටියෙම තුන්දෙනාගෙම වැඬේ කාමරේට වෙලා කුටු කුටු ගගා කැකිරි පළන එකයි.
දිනක්ෂි ගැන ඔබේ මීළඟ බලාපොරොත්තුව මොකද්ද?
දිනක්ෂි මේ දවස්වල ඩිග්රි එක කම්ප්ලීට් කරනවා. ඒක අවසන් වුණාට පස්සේ ඉතින් ඇගේ විවාහය ගැන තමා මගේ එකම බලාපොරොත්තුව.
සහකාරයාව තෝරාගෙන අවසන්ද?
තවම නැහැ. අප ඇයට ඒ සඳහා ඉඩදී බලා සිටිනවා. විවාහය වැනි බැඳීමක් සඳහා දිනක්ෂි වැරැදි පියවරක් නොගන්න බව විශ්වාසයි.
‘ලද ජීවිතය’ දිනක්ෂිගේ වාසනාවද නැත්නම් දේව අනුහසද?
වාසනාවත් ඒ තුළ තිබෙනවා. ඒ වගේම මේ සියල්ල ඇයට දෙවියන් වහන්සේගෙන් ලැබුණු කලෙන්තු කියලයි මම සුවිශේෂීව හිතන්නෙ.
