නැටුමට, රැඟුමට හපන් ඇය කාලයත් එක්ක තාරකාවියක් විය. ඒ සුනිල් කොස්තා අධ්‍යක්‍ෂණය කළ රොමියෝ ජුලියට් ටෙලිනාට්‍ය හරහා. ඒත් ඇය මේ වන විට වේදිකාවේ විතරක් නොව ටෙලිනාට්‍යවලද චරිතාංග රංගන ශිල්පිනියක් වී හමාරයි. මේ දිනවල විකාශය වන ජනප්‍රියම ටෙලිනාට්‍ය කිහිපයකම චරිත මවමින් ඔබ හමුවට එන රොෂානා ඕන්ඩච්චි ලද විවේකය අප සමඟ පිළිසඳරකට එකතු වුණා.
රොෂානාගේ සිහිනයක් තිබුණා ජනප්‍රිය තරුවක් සමඟ එකට රඟපාන්න. ඒ සිහිනය සැබෑ වුණාලු නේද?
මම මුලින්ම ‘හේලි’ ටෙලිනාට්‍යයේ අධ්‍යක්‍ෂ ධනුෂ්ක රත්නායකට ස්තුති කරනවා. මේ අවස්ථාව ලබා දීම එක ගැන. ඔහු මට මේ ආරාධනාව කරන විට මම ලංකාවේ හිටියෙත් නැහැ. ඔහුගේ නිර්මාණයකට සම්බන්ධ වෙන්න හිතේ පොඩි ආසාවක් තිබුණා. නමුත් අශාන් ඩයස්ගේ බිරියගේ චරිතය තමයි මට රඟපාන්න තියෙන්නේ කියලා ඔහු කිව්වම මට අදහාගන්න බැරි වුණා. ඒ තරමට මම ආසා කරන රංගන ශිල්පියෙක් ඔහු. මම ඔහුගේ රසිකාවියක් කියා කිව්වොත් හරි.
චාලිගේ බිරිය විදියට රඟපාන ඔබට චාලි ගැන මොකද හිතෙන්නේ?
මට එය ගැන විස්තරාත්මකව කියන්න බැහැ. නමුත් චාලි පවුලට ගොඩාක් ආදරෙයි. ඒ වගේ පවුලකට මමත් ආදරෙයි. හරිම එකමුතුවෙන්, සතුටින් තමයි චාලි කාලය ගතකරන්නේ. ඒ සියල්ල ඉදිරියේදී දැකබලාගන්නට පුළුවන්.
දැන් එතකොට තමාලි මංචනායක කෝ?
එය මටත් හිතාගන්න බැහැ. සිඳූ ටෙලිනාට්‍ය වෙනස් පැත්තකට ගලාගෙන යනවා. මම කාලයක් නිහඬ වෙලා ඉඳලා නැවැත ප්‍රේක්‍ෂකයන් අතරට ආවේ සිඳූ හරහා තමයි. කතාවේ වෙනස් වීමත් එක්ක ටෙලිනා්‍යයේ චරිත ගොඩාක් ඉවත් වෙලා අලුත් චරිත ඒ අතරට ගලාගෙන ඇවිත්.
මේ ගෙවී ගිය වසර මම හිතන්නේ රොෂානාගේ ජීවිතයේ ලොකු කඩඉම් කාලයක් වෙන්න ඇති?
ඇත්තටම ගොඩාක් ප්‍රශ්න මතුවුණා. 2019 වසර මට ගොඩාක් පාඩම් කියලා දුන්නා. ප්‍රශ්නත් ආවා. ඒවා විසඳාගන්න කාලයක් ගෙවුණා. එයට මගේ දුව මට ශක්තියක් වුණා. දැන් මොන ප්‍රශ්නයක් ආවත් මම බය නැහැ. ඒ හැම දේකටම මුහුණ දෙන්න මට ආත්ම ශක්තියක් තියෙනවා. ගිය දේවල් නැවත හිත හිතා විඳවන්න මම කැමැති නැහැ. සතුටින් දුව එක්ක ඉන්නවා.
රොෂානාට විවිධ කටකතා පැතුරුණා. ගැහැනියක් විදියට කොහොමද ඔබ එය දරාගත්තේ?
මම වැරැදි කරලා නැහැ. මාව වට්ටන්න ගොඩ දෙනෙක් උත්සාහ කළා. ඒත් මම වැටුණේ නැහැ. මගේ පවුලේ අය මට හයියක් වුණා. ඉතින් මම කිසිම දෙයක් විශ්වාස කරන්නේ නැහැ. මට වැරැදි කරපු අයට ස්වභාවධර්මය අනුව ප්‍රතිඵල ලැබෙයි.
කාලයක් ඔබ චරිතවලට කොටුවීමක් අපි දුටුවා. ජීවිතයේ වෙනස්වීම් එක්ක ඒ හැම දේම වෙනස් වෙලා?
ඇත්තටම එය රංගන ශිල්පීන් වූ අපට ලොකු අසාධාරණයක් කියලා මමත් හිතන්නේ. බටහිර චරිතවලට කොටුවීමක් වුණා. දැන් නම් ඒ තත්ත්වය මඟහැරිලා වෙනස් චරිත සඳහා මට ආරාධනා එනවා. මේ මගේ හොඳම කාලය කියලා මම හිතනවා.
අම්මා වගේම දුවත් රඟපාන්න කැමැතිද?
දුව රඟපාන්න කිසිම කැමැත්තක් නැහැ. ආරාධනා ලැබුණත් බැහැ කියලා ප්‍රතික්‍ෂේප කළා. දුව කැමැති නිවේදන ක්‍ෂේත්‍රයෙන් ඉදිරියට යන්න තමයි. ඒ වෙනුවෙන් දුවගේ කැමැත්තට මම ඉඩ දෙනවා. දුව 7 වසරේ ඉඳලම ගුවන්විදුලියේ ළමා නිවේදිකාවක් විදියට වැඩකටයුතු කරනවා.
