වැලිසර නාවික හමුදා කඳවුරේ සිට ඉකුත් 21 වැනිදා තංගල්ල රැකව ප්‍රදේශයේ නිවෙසට පැමිණ සිටි නාවික හමුදා නිලධාරියකු ඊයේ (26) PCR පරීක්ෂණ සඳහා යොමු කර තිබූ අතර ඔහු කොවිඩ් -19 ආසාදිත වී ඇති බවට අද හඳුනාගත් බව තංගල්ල සෞඛ්‍ය වෛද්‍ය නිලධාරී ජගත් ගජධීර මහතා පැවසුවා.
මෙම නිලධාරියා සහ ඔහුගේ මව, පියා සහ නැගණිය ඉකුත් 24 වැනිදා සිට ඔහුගේ නිවෙසෙහි නිරෝධායනය කිරීමට මහජන සෞඛ්‍ය පරීක්ෂකවරු පියවර ගෙන තිබුණා. 24 වැනිදායින් පසු එම නිවෙසට පැමිණි බව කියන ප්‍රදේශයේ ග්‍රාම නිලධාරිවරයකුද නිරෝධායනය කිරීමට මහජන සෞඛ්‍ය පරීක්ෂකවරු අද (27) පියවර ගත්තා.
නිලධාරියාගේ නිවෙස සහ අවට පරිසරය විෂබීජහරණය කිරීමටත් නෙටොල්පිටිය – රැකව මාර්ගයේ පදිංචිව සිටින ජනතාවට නිවෙස්වලින් බැහැර යාමෙන් වළකින ලෙසද තංගල්ල සෞඛ්‍ය වෛද්‍ය නිලධාරී කාර්යාලයේ නිලධාරීහු දැනුම් දී තිබෙනවා.
කොරෝනා ආසාදිත බවට තහවුරු වූ නාවික හමුදා නිලධාරියා ඉකුත් 21 වැනිදා තංගල්ලේ පිහිටි සුපිරි වෙළෙදසැලකට ගොස් ඇතැයි අනාවරණය වීම නිසා එම වෙළෙදසැල අද (27) දින සිට තාවකාලිකව වසා දැමීමට ද නිලධාරීන් කටයුතු කළා.
