කොවිඩ් – 19 හෙවත් කොරෝනා වයිරසය පාලනය කිරීම සඳහා හොඳම විසඳුම නිරෝධායන ඇඳිරි නීතිය පැනවීම නොවන බවත් එය පාලනය කිරීමට නම් අවංකවම සෞඛ්‍ය උපදෙස් පිළිපැදීමට සියලුම දෙනා කැපවිය යුතු බවත් එය පුද්ගල චර්යාවන් මත බලපාන කරුණක් බවත් කොවිඩ් – 19 මර්දනය කිරීමේ ජාතික ක්‍රියාන්විත මධ්‍යස්ථානයේ ප්‍රධානී යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා සති අන්ත පුවත්පතකට ප්‍රකාශ කර තිබෙනවා.
ගම්පහ දිස්ත්‍රික්කයට සති දෙකකට වැඩි කාලයක් තිස්සේ නිරෝධායන ඇඳිරි නීතිය ක්‍රියාත්මක වුවද වැඩිම කොවිඩ් – 19 ආසාදිත රෝගීන් සංඛ්‍යාවක් දැනටත් වාර්තා වන්නේ ගම්පහ දිස්ත්‍රික්කයෙන් බවද යුද හමුදාපතිවරයා විසින් පෙන්වා දෙනු ලැබුවා.
කොළඹ දිස්ත්‍රික්කයේ මට්ටක්කුලිය ඇතුළු උතුරු කොළඹ ප්‍රදේශයේ පොලිස් බල ප්‍රදේශ කිහිපයක නිරෝධායන ඇඳිරි නීතිය සතියකට වැඩි කාලයක් ක්‍රියාත්මක වුවද කොළඹ දිස්ත්‍රික්කයේ මට්ටක්කුලිය ප්‍රදේශයෙන් දැනටත් වැඩිම කොවිඩ් – 19 ආසාදිත රෝගීන් හමුවන බවත් යුද හමුදාපතිවරයා සඳහන් කරනවා.
නමුත් නිරෝධායන ඇඳිරි නීතිය ක්‍රියාත්මක කරනු ලබන්නේ කොවිඩ් – 19 පාලනය කිරීම සඳහා යම් පසුබිමක් සැකසීමට බවත් එය හොඳින් සාර්ථක වීමට නම් නිරෝධායන ඇඳිරි නීතිය ක්‍රියාත්මක වුවද ජනතාව සෞඛ්‍ය උපදෙස් අනුගමනය කරමින් නිවෙස් තුළ රැඳී සිටිය යුතු බවත් යුද හමුදාපතිවරයා සඳහන් කරනවා.
බස්නාහිර පළාතට යොදා ඇති නිරෝධායන ඇඳිරි නීතිය සඳුදා (02) අලුයම 5.00ට ඉවත් කරන බවත් පසුගිය බ්‍රහස්පතින්දා මධ්‍යම රාත්‍රියට පෙර නිරෝධායන ඇඳිරි නීතිය පැනවූ පොලිස් බල ප්‍රදේශ කිහිපයක ඇඳිරි නීතියද සඳුදා අලුයම 5.00ට ඉවත් කිරීමට බලාපොරොතු වන බවත් යුද හමුදාපතිවරයා සඳහන් කරනවා.
කෙසේ නමුත් එම පොලිස් බල ප්‍රදේශවලින් කුමන පොලිස් බල ප්‍රදේශවල නිරෝධායන ඇඳිරි නීතිය ඉවත් කරන්නේද කියා සමාලෝචනයන් සිදුකර ඒ සම්බන්ධයෙන් අවසන් තීන්දුව ගනු ලබන්නේ හෙට (01 ) සවස බවද යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා වැඩිදුරටත් ප්‍රකාශ කර තිබුණා.
