පෝට් සිටිය සම්බන්ධයෙන් විජයදාස රාජපක්ෂ මහතාට හෝ වෙනත් අයකුට ගැටලුවක් ඇත්නම් එය ආණ්ඩුව ඇතුළේම විසදාගත හැකිව තිබූ බවත්, එසේ කතා නොකිරීම ගැටලුවක් බවත් කෘෂිකර්ම අමාත්‍ය මහින්දානන්ද අලුත්ගමගේ මහතා පැවසීය.
පෝට් සිටි කෙටුම්පත සහ විජයදාස රාජපක්ෂ මහතා අද පැවැත්වූ මාධ්‍ය හමුවට පිළිතුරු දෙමින් අමාත්‍යවරයා මේ බව සදහන් කර සිටියේය.
එමෙන්ම තමන් හිටපු ජනාධිපතිවරුන් කිහිප දෙනකු යටතේම ඇමැතිකම් දැරූ බව කී අලුත්ගමගේ මහතා ඒ සෑම ජනාධිපතිවරයකුම යම් ප්‍රශ්නයක් පැන නැගුනු අවස්ථාවකදී දුරකතනයෙන් කතා කොට විමසීම් කරන බවත්, එය සාමාන්‍ය සිදුවීමක් බවත් කියා සිටියේය.
එමෙන්ම තමන් මුරුත්තෙට්ටුවේ හිමියන් මුණගැසීමට අභයාරාමයට ගිය බවත්, එහිදී මුරුත්තෙට්ටුවේ හිමියන්ට විපක්ෂනායක සජිත් ප්‍රේමදාස මහතාගෙන් දුරකතන ඇමතුමක් පැමිණි බවත් අමාත්‍යවරයා සදහන් කළේය.
පෝට්සිටිය හරහා මේ රට ඊළග සිංගප්පූරුවක් කරන වැඩපිළිවෙළ කඩාකප්පල් කිරීමට විපක්ෂනායකවරයා ඇතුලු පිරිසක් කටයුතු කරමින් සිටින බවත් අමාත්‍යවරයා එහිදී පෙන්වා දුන්නේය.
