සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
අමාත්ය ධුරයන්හි වෙනස්කම් සිදු වුවද, ජනතාවට අත්යවශ්ය සේවාවන් වන විදුලිය සහ ඉන්ධන අඛණ්ඩව ලබා දීමේ රජයේ මූලික ප්රතිපත්තියේ කිසිදු වෙනසක් සිදු නොවන බව නව බලශක්ති අමාත්ය අනුර කරුණාතිලක මහතා අවධාරණය කරයි.
බලශක්ති අමාත්යවරයා ලෙස වැඩ භාරගැනීමෙන් අනතුරුව මාධ්ය වෙත අදහස් දක්වමින් අමාත්යවරයා කියා සිටියේ, ජාතික බලශක්ති ප්රතිපත්තිය දිගුකාලීන ඉලක්ක මත පදනම්ව ස්ථාවරව පවත්වාගෙන යන බවයි. හිටපු අමාත්ය කුමාර ජයකොඩි මහතා ද මෙම අවස්ථාවට එක්ව සිටියේය.
ගල්අඟුරු ආනයනය සම්බන්ධයෙන් පත් කළ විශේෂ ජනාධිපති පරීක්ෂණ කොමිසමේ කටයුතු ස්වාධීනව සහ අපක්ෂපාතීව පවත්වාගෙන යාමට පහසුකම් සැලසීම සඳහා හිටපු අමාත්ය කුමාර ජයකොඩි මහතා සහ අමාත්යාංශ ලේකම් මහාචාර්ය උදයංග හේමපාල මහතා අප්රේල් 17 වනදා සිය ඉල්ලා අස්වීමේ ලිපි ජනාධිපතිවරයා වෙත භාර දුන්හ. ඒ අනුව ඇති වූ පුරප්පාඩුව සඳහා වරාය සහ සිවිල් ගුවන් සේවා අමාත්ය අනුර කරුණාතිලක මහතා පත් කිරීමට ජනාධිපතිවරයා පියවර ගෙන තිබුණි.
අමාත්යාංශයේ විනිවිදභාවය සහ කළමනාකරණය පිළිබඳව විපක්ෂය එල්ල කරන විවේචනවලට ප්රතිචාර දැක්වූ අමාත්යවරයා, දූෂණ හෝ අක්රමිකතා පිළිබඳව කිසියම් නිශ්චිත සාක්ෂියක් ඇත්නම් ඒවා අල්ලස් හෝ දූෂණ විමර්ශන කොමිසම, අපරාධ විමර්ශන දෙපාර්තමේන්තුව හෝ ජනාධිපති විශේෂ විමර්ශන කොමිසම වෙත ඉදිරිපත් කරන ලෙස අභියෝග කළේය. මාධ්ය සංදර්ශන පවත්වනු වෙනුවට නීතිමය මාර්ග අනුගමනය කරන ලෙස ඔහු විපක්ෂයෙන් ඉල්ලා සිටියේය.
විදුලි කප්පාදුවක් සිදුවිය හැකි බවට පළවන වාර්තා ප්රතික්ෂේප කළ අමාත්යවරයා මෙසේ පැවසීය:
"නව අමාත්යවරයා ලෙස මට විශේෂ පියවර ගැනීමට අවශ්ය නැහැ. හිටපු අමාත්යවරයා, නියෝජ්ය අමාත්යවරුන් සහ නිලධාරී මඩුල්ල දැනටමත් අවශ්ය මූලික පියවර ගෙන තිබෙනවා. එම සැලසුම් ක්රියාත්මක කළහොත් අපට විදුලි කප්පාදුවකට යාමට අවශ්ය වන්නේ නැහැ. මගේ කාර්යය වන්නේ එම කටයුතු සාර්ථකව පවත්වාගෙන යාමට අවශ්ය ප්රතිපත්තිමය සහ රාජ්ය මැදිහත් වීම ලබා දීමයි."
ගෝලීය ඉන්ධන මිල ඉහළ යාම සහ මැදපෙරදිග පවතින නොසන්සුන්කාරී තත්ත්වය රජයේ පාලනයෙන් බැහැර කරුණු වුවද, ඉන් මහජනතාවට වන බලපෑම අවම කිරීමට රජය බැඳී සිටින බව අමාත්යවරයා පැවසීය. "මිල සම්බන්ධ ඇතැම් සිදුවීම් පාලනය කිරීමට අපට නොහැකි වන්නට පුළුවන්. නමුත් කුමන තත්ත්වයක් යටතේ වුවද විදුලිය සහ ඉන්ධන අඛණ්ඩව සැපයීමට අපි කටයුතු කරනවා," යැයි ඔහු වැඩිදුරටත් සහතික විය.
