සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
උක් ගොවීන්, සේවකයින්, ට්‍රැක්ටර් රථ රියැදුරන් ඇතුළු පිරිසක් එක්ව සෙවනගල සීනි කර්මාන්ත ශාලාව ඉදිරිපිට අද දිනයේ සත්‍යග්‍රහයක් ඇරඹූහ.
උක් ගොවීන්ට සහ සැපයුම්කරුවන්ට ගෙවිය යුතු මුදල් පාලන අධිකාරිය මඟින් නොගෙවීම ඇතුළු තවත් ඉල්ලීම් රැසක් මුල් කරගනිමින් ජන අරගල පුරවැසියෝ සංවිධානය මෙය සංවිධානය කර ඇත.
සෙවණගල උක් ගොවීන්ගේ ගැටලු පිළිබඳව සාකච්ඡාවක් (28) දිනයේදී සභාපතිතුමිය සහ විධායක අධ්‍යෂතුමිය සමඟ කොළඹදී පැවැති බවත් එම සාකච්ඡාවෙන් කිසිදු ඵලක් නොවූ බැවින් උක් අස්වනු නෙළීම නවතා දැමීමට තමන් තීරණය කළ බව උක් ගොවි බලමණ්ඩලයේ සභාපති රුවන් සංජීව මහතා පැවැසීය.
මෙම සාකච්ඡාවට ගොවි බලමණ්ඩල නියෝජිතයන් සහ ට්‍රැක්ටර් රථ සංගම් නියෝජිතයන් සහභාගි වූ අතර සෙවණගල සීනි ආයතනය වෙනුවෙන් එහි සභාපති සඳමාලි චන්ද්‍රසේකර සහ විධායක අධ්‍යක්ෂ දිපිකා කේ. ගුණරත්න යන මහත්මින් සහභාගි වූ බවත් එහිදී
මේ වන විට ගොවීන් සතු ගැටලු වශයෙන් මේ දක්වා ආයතනය ලබා දී ඇති උක්වලට මුදල් නොගෙවීම, උක් ලබා ගැනීමේ ප්‍රමාද වීම, ආයතනය සතු කටර් දෙකෙන් එකක් පමණක් වැඩ කිරීම අනික් කටර් යන්ත්‍රය සෑදීම ප්‍රමාද කිරීම ඇතුළු කරුණු රැසක් ගොවි නියෝජිතයන් පෙන්වා දී ඇති අතර ගොවීන්ට මුදල් නොලැබීම තුළ ඇතැම් ගොවි පවුල් ඉතා අසරණව තම දරුවන්ට ආහාර වේලක් ලබා දීමට නොහැකි තත්ත්වයට පත්ව ඇති බව උක් කැපු අයට කුලිය බේරීමට තමන් සතු සියල්ල උකස් කර ඇති බව පෙන්වා දී ඇත.
ට්‍රැක්ටර් රථ සංගමය පෙන්වා දී ඇත්තේ තමන්ට ලබා දිය යුතු මුදල් ප්‍රමාද වීමෙන් ට්‍රැක්ටර් රථ වලට ගෙවිය යුතු ලීසිං ගෙවීම නොහැකි වීම හේතුවෙන් තමන් දැඩි පීඩනයට පත්ව ඇති අතර ඒ සඳහා මේ වන විට තම බිරිය දරු දැරියන් සතු කනකර උකසට තබා හමාර බවයි.
එබැවින් තමන්ට ලබා දීමට ඇති මුදල් ලබා දීමට කටයුතු කරන ලෙසත් උක් පැටවීමේදී එක් ඩක්කුවකට ටොන් 7කට වැඩිය පැටවුව හොත් අතින් බෑමට සිදු වන බැවින් එය එසේ නොවීමට තරාදිය නිසි පරිදි සකසා දෙන ලෙසයි.
සාකච්ඡාවට ආයතනය වෙනුවෙන් සහභාගි වූ සභාපතිතුමිය සහ විධායක අධ්‍ය ෂතුමිය කියා ඇත්තේ සීනි සහ එතනෝල් විකිණීමේ ගැටලුවක් පවතින බැවින් සීනි සහ එතනෝල් අලෙවිය අනුව ටිකෙන් ටික මුදල් ලබා දීම හැර වෙනත් විකල්පයක් නැති බවත් මේ වන විට සේවක සේවිකාවන්ගේ පඩිය පවා ලබා දීම ප්‍රමාද වී ඇති බැවින් එය ඊයේ (29 දා) ලබා දීමට කටයුතු කරමින් සිටින බවත් කැමැති අයට ආයතනයට උක් ලබා දිය හැකි බවයි.
ඒ අනුව ගොවි නියෝජිතයන් සහ ට්‍රැක්ටර් රථ නියෝජිතයන් තීරණය කර ඇත්තේ එතනෝල් සහ සීනි විකිණීමෙන් උපයා ගන්නා මුදල සේවක පඩි ගෙවීමට හැර තම මුදල් ගෙවීමට ප්‍රමාණවත් නොවන බැවින් දැනට ට්‍රැක්ටර් රථ ඩක්කුවල පටවා ඇති උක් සහ ගොවිබිම්වල කපා ගොඩ ගසා ඇති උක් දින කීපයක් තුළ ආයතනයට ගෙනවිත් භාර දීමටත් ස්ථිර විසඳුමක් ලබා දෙන තුරු උක් අස්වනු කැපීම නවතා දැමීමටත් ඉදිරියේදී අමාත්‍යංශ මට්ටමින් ඇමැතිතුමා හෝ ජනාධිපතිතුමා සමඟ සාකච්ඡාවක් ලබා ගැනීමට උත්සාහ දරන බවයි.
– සෙවණගල කේ.පී. සුමනදාස
