සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
ශ්රී ලංකාව විසින් මෑතකදී ලබාගත් ඩීසල් නෞකා කිහිපයක් සඳහා බැරලයකට ඇමරිකානු ඩොලර් 281 සිට 288 දක්වා අතිවිශාල මිලක් ගෙවා ඇති බව ලංකා ඛනිජ තෙල් නීතිගත සංස්ථාවේ සාමාන්යාධිකාරී මයුර නෙත්තිකුමාරගේ මහතා උපුටමින් සන්ඩේ ටයිම්ස් වාර්තා කරයි.
මාර්තු මස අවසන් සතියේ සිට අප්රේල් දෙවන සතිය දක්වා කාලය තුළ ඩීසල් නෞකා තුනක් මෙලෙස මිලදී ගත් බව ඔහු පවසා ඇත.
ඒ අනුව:
මාර්තු 31: ඩීසල් බැරල් 240,000ක් (බැරලයක් ඩොලර් 285 බැගින්)
අප්රේල් 6-7: ඩීසල් බැරල් 295,000ක් (බැරලයක් ඩොලර් 288 බැගින්)
අප්රේල් 7-8: ඩීසල් බැරල් 254,000ක් (බැරලයක් ඩොලර් 281 බැගින්)
යුද්ධයට පෙර ඩොලර් 3ක්ව පැවති ප්රවාහන, රක්ෂණ සහ සැපයුම් ගාස්තු (Premium) මේ වන විට බැරලයකට ඩොලර් 45ත් 50ත් දක්වා ඉහළ ගොස් ඇති බව සාමාන්යාධිකාරීවරයා පෙන්වා දුන්නේය.
මෙම පිරිවැය ඉහළ යාම මත මාර්තු 21 වනදා සිට මෙරට ඔටෝ ඩීසල් ලීටරයක මිල රුපියල් 79කින් සහ සුපිරි ඩීසල් ලීටරයක මිල රුපියල් 90කින් ඉහළ නැංවීමට රජයට සිදු විය.
HSBC සමූහයේ ප්රධාන විධායක නිලධාරී ජෝර්ජ් එල්හෙඩරි මහතා බ්ලූම්බර්ග් පුවත් සේවය සමඟ පැවති සාකච්ඡාවකදී ශ්රී ලංකාව ඩොලර් 286ක් වැනි ඉහළ මිලකට තෙල් මිලදී ගන්නා බව හෙළි කිරීමත් සමඟ මෙම කරුණු ප්රසිද්ධියට පත් විය.
කෙසේ වෙතත්, එල්හෙඩරි මහතා අදහස් කළේ 'පිරිපහදු කළ තෙල්' (Refined oil) ගැන වුවද, දේශීය මාධ්ය එය 'බොරතෙල්' (Crude oil) ලෙස වැරදියට වාර්තා කිරීම හේතුවෙන් ඛනිජ තෙල් සංස්ථාව සහ රජය එම ප්රකාශය මුලින් ප්රතික්ෂේප කර තිබුණි.
සිකුරාදා පැවති මාධ්ය හමුවකදී සංස්ථාවේ සභාපති ඩී.ජේ.ඒ.එස්. ද එස්. රාජකරුණා මහතා තහවුරු කළේ, ශ්රී ලංකාව බොරතෙල් මිලදී ගෙන ඇත්තේ බැරලයක් ඩොලර් 66ත් 113ත් අතර මිලකට බවයි. නමුත් පිරිපහදු කළ ඩීසල් සඳහා HSBC ප්රධානියා සඳහන් කළ පරිදිම ඩොලර් 286කට ආසන්න මිලක් ගෙවීමට සිදුවූ බව ඔහු පිළිගත්තේය.
සභාපතිවරයා පැවසූ පරිදි පෙබරවාරි මාසයේදී ඩොලර් 88.83ක් වූ ඩීසල් බැරලයක සාමාන්ය මිල, අප්රේල් මාසය වන විට ඩොලර් 199.70 දක්වා ඉහළ ගොස් තිබේ.
එහෙත් සාමාන්යාධිකාරීවරයා ඉදිරිපත් කළ දත්තවලට අනුව ඇතැම් නෞකා සඳහා එම සාමාන්ය අගයටත් වඩා වැඩි මිලක් ගෙවා ඇති බව පැහැදිලි වේ.
මෙම සියලු මිලදී ගැනීම් නිසි ටෙන්ඩර් පටිපාටියක් යටතේ කැබිනට් අනුමැතිය ඇතිව සිදු කර ඇති බව සංස්ථාව වැඩිදුරටත් අවධාරණය කරයි.
