සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
දකුණු කොරියානු පොලිස් ආයතනය සඳුදා විදෙස් මාධ්‍යට ප්‍රකාශ කර තිබෙන්නේ, සංක්‍රමණික සේවකයින්ට එරෙහිව සිදුවන දූෂණ, අපයෝජන මැඩපැවැත්වීම සඳහා දින 100ක විශේෂ මර්දන මෙහෙයුමක් ආරම්භ කරන බවයි.
එරට ප්‍රාදේශීය පොලිස් ආයතන 18 තුළම මේ සඳහා විශේෂ ඒකකයක් ද පිහිටා තිබෙනවා.
එම ඒකකය මගින් නොවැම්බර් 25 වන දක්වා, දින 100ක විශේෂ මර්දන මෙහෙයුමක් ක්‍රියාත්මක කිරීමට නියමිත බවයි සඳහන් වන්නේ.
මෙහිදී විදේශීය කම්කරුවන්ට එරෙහිව සිදුවන ප්‍රහාර, ශාරීරික හානි, බලපෑම්, අපහාස, ලිංගික පීඩනය වැනි අයුතු වැඩකටයුතු පිළිබඳ පරීක්ෂා කිරීමට නියමිතයි.
මෙම පියවරට හේතු වූයේ, ශ්‍රී ලාංකීය කම්කරුවෙකු ෆෝක්ලිෆ්ට් රථයකට බැඳ ඉහළට ගෙන යන වීඩියෝවක් සමාජ මාධ්‍යයේ සංචරණය වීම සහ එම විඩීයෝවට දැඩි විරෝධයක් ඇති වීමයි.
මෙම සිද්ධිය සිදුවූයේ පෙබරවාරි මාසයේ දකුණු ජොල්ලා පළාතේ නාජු නගරයේ ගඩොල් කර්මාන්තශාලාවකයි.
එහිදී දින 90ක පමණ කාලයක් සේවය කළ ශ්‍රී ලාංකික කම්කරුවා රැකියාවේදී වැරදි සිදු කිරීම හේතුවෙන්, අවුරුදු 50ක පමණ වයසැති කොරියානු ෆෝක්ලිෆ්ට් රියැදුරෙකු විසින් අමානුෂික ලෙස පීඩනයට ලක් කර තිබෙනවා.
දකුණු කොරියානු පොලිස් ඒකක විසින් හදිසි ඇමතුම් විශ්ලේෂණය කිරීමෙන් සහ රාජ්‍ය නොවන සංවිධාන, බහු සංස්කෘතික සංවිධාන විසින් පවත්වාගෙන යනු ලබන විදේශීය සේවක සහාය මධ්‍යස්ථානවලින් තොරතුරු රැස් කිරීමෙන් මෙවැනි අවස්ථා හඳුනාගෙන තිබෙනවා.
එමෙන්ම දකුණු කොරියාවේ ශ්‍රී ලංකා තානාපතිනි සාවිත්‍රි පානබොක්කේ, අගෝස්තු 17 වන දින නාජු වෙත ගොස් සංක්‍රමණික සේවකයින්ගේ අයිතිවාසිකම් ශක්තිමත් ලෙස ආරක්ෂා කරන ලෙසත් මානව හිමිකම් උල්ලංඝනයන් වැළැක්වීමට පියවර ගන්නා ලෙසත් ඉල්ලා සිටියා.
