“ඇඟිලි සළකුණ තියන්න බැරි අය වෙන රස්සාවක් හොයාගන්න” ඇමති නලින්දගෙන් ඉතිහාසගතවෙන ප්‍රකාශයක්..

 

සම්පූර්ණ පුවත කියවන්න පහත "පුවත කියවන්න" බොත්තම ඔබන්න..

තැපැල් වෘත්තීය සමිති සමඟ සාකච්ඡා කළ හැක්කේ, සේවයට පැමිණීම සහ පිටවීම සඳහා ඇඟිලි සලකුණු සටහන් තැබීම සහ අතිකාල සම්බන්ධයෙන් රජය ගත් තීරණ පිළිගන්නේ නම් පමණක් බව කැබිනට් ප්‍රකාශක, අමාත්‍ය වෛද්‍ය නලින්ද ජයතිස්ස අවධාරණය කරයි.

අද (19) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම් දීමේ ප්‍රවෘත්ති සාකච්ඡාවේදී මාධ්‍යවේදීන් යොමු කළ ප්‍රශ්නවලට පිළිතුරු දෙමින් අමාත්‍යවරයා මේ බව සඳහන් කළේය.

තැපැල් දෙපාර්තමේන්තු වෘත්තීය සමිති විසින් ඉදිරිපත් කරන ලද ඉල්ලීම් 19න්, 17ක්ම මේ වන විට විසඳා හෝ විසඳමින් පවතින බවත්, සේවා ව්‍යවස්ථාව, නව බඳවාගැනීම්, තැපැල් කාර්යාල නවීකරණය හා වාහන අඩුපාඩු සඳහා මූල්‍ය ප්‍රතිපාදන වෙන්කර ඇති බවත් ඔහු පැවසීය.

“මේ වෙනකොට ඉල්ලීම් දෙකක් ඉතුරු වෙලා තියෙනවා. ඒකෙන් අතිකාල දීමනා ප්‍රශ්නය ගත්තොත්, සමස්ත රජයේ සේවකයන්ටම 2025 අප්‍රේල් 1 වනදා සිට මූලික වැටුප් වැඩිවීමක් සිද්ධ කළා. ඒ වැඩිවීම මත තමයි අතිකාල දීමනා ගණනය කිරීම සිද්ධ වෙන්නේ,” අමාත්‍යවරයා පැවසීය.

මෙහිදී තැපැල් සේවකයන්ට 2027 දී ලැබෙන මූලික වැටුපට අදාළව ගණනය කර, එහි 5/6ක ප්‍රමාණයක් ලබාදීමට කටයුතු කර ඇති බවත්, මෙය සමස්ත රජයේ සේවකයන් සඳහා ගත් පොදු තීරණයක් බැවින් එය වෙනස් කළ නොහැකි බවත් ඔහු අවධාරණය කළේය.

ඇඟිලි සලකුණු සටහන් තැබීම පිළිබඳව අදහස් දැක්වූ අමාත්‍යවරයා, “මහජන බදු මුදලින් වැටුප් ලබන විට එහෙම වැඩ කරන්න බෑ. අතිකාල වැඩි කරන්නත් බෑ. ඇඟිලි සලකුණු කිරීම ඉවත් කරන්නත් බෑ. ඒකට විරුද්ධ අයට වෙන තැන් වල රැකියා හොයාගන්න පුළුවන්. අපි ඒ තීන්දුවේ දැඩිව ඉන්නවා,” යනුවෙන් ප්‍රකාශ කළේය.

මෙම වර්ජනය පිටුපස දේශපාලන පක්ෂ සිටින බවට ද ඔහු චෝදනා කළේය. තැපැල් කාර්යාලවලින් 90%ක් සාමාන්‍ය පරිදි ක්‍රියාත්මක වන බවත්, මධ්‍යම තැපැල් හුවමාරුවේ සිටින ඉතාම සීමිත පිරිසක් පමණක් මෙම තීරණයට විරුද්ධ බවත් අමාත්‍යවරයා වැඩිදුරටත් පැවසීය.

හැමදාමත් මේවාට යටවී සිටිය නොහැකි බවත් එබැවින් තැපැල් ප්‍රමාදවීම සම්බන්ධව ඉවසීමෙන් සිටින ලෙස ජනතාවට දැනුම්දුන් අමාත්‍යවරයා දින කිහිපයක් තුල ප්‍රශ්නය විසඳන බවද පැවසීය.