සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
කුරුණෑගල – කහල්ලපල්ලෙකැලේ අභයභූමියේ ඉඩම් බලහත්කාරයෙන් අත්පත් කරගැනීමට එරෙහිව දැඩිව නීතිය ක්‍රියාත්මක කළ වනජීවී නිලධාරී චතුර ගුණරත්න ට එල්ල වූ දේශපාලන බලපෑම් සහ රාජකාරියට බාධා කිරීම් හේතුවෙන් ඔහු ස්ථාන මාරුවක් ගෙන ඉවත්ව යාමට තීරණය කර ඇති බව වාර්තා වේ.
ගුණරත්න මහතාගේ සමීපතමයන් පවසන්නේ, මෙම තීරණයට ප්‍රධානතම හේතුව වී ඇත්තේ, අභයභූමියට අයත් ඉඩමක් බලහත්කාරයෙන් අත්පත් කරගැනීමට එරෙහිව ඔහු විසින් අධිකරණයෙන් තීන්දුවක් ලබා ගැනීමයි.
ප්‍රශ්නගත ඉඩම තුළ අලි තිදෙනෙකු ඝාතනය වීමද මෙම සිදුවීමට ප්‍රධාන හේතුවක් වී ඇත.
ගුණරත්න මහතාට දේශපාලනික වශයෙන් මඩ ගැසීම් සහ තර්ජන එල්ල වී ඇත්තේ, ඉඩම් ජාවාරම්කරුවන්ට එරෙහිව ඔහු ගත් ක්‍රියාමාර්ග සහ නීතිය නිසි පරිදි ක්‍රියාත්මක කිරීමට උත්සාහ කිරීම නිසා බව සඳහන් වේ.
මෙම නිලධාරියා අකුරට නීතිය ක්‍රියාත්මක කිරීම හේතුවෙන් , විශේෂයෙන්ම කුරුණෑගල දිස්ත්‍රික්කයේ සිටින ආණ්ඩුවේ දේශපාලනඥයන්ගේ උදහසට ලක්ව ඇති බවද සඳහන් වෙයි.
විශේෂයෙන් ඡන්ද සමයේ ඉඩම් ලබා දෙන බවට දුන් පොරොන්දු සහ ඥාති-සහකාරාදීන්ගේ ඉඩම් සම්බන්ධයෙන් පවා නීතිය ක්‍රියාත්මක කිරීම, ඔවුන්ගේ දැඩි විරෝධයට ලක්ව තිබේ.
අලි-මිනිස් ගැටුම උග්‍රව පවතින මෙම ප්‍රදේශයේ වන අලි ඇතුන්ගේ වාසස්ථාන ආරක්ෂා කිරීමට ගුණරත්න මහතා උත්සාහ කර ඇති බව ප්‍රදේශවාසීන් පෙන්වා දෙයි. ඔහු සිය රාජකාරිය නිවැරදිව ඉටු කරද්දී එල්ල වූ පීඩනය සහ අනාරක්ෂිත බව නිසා මෙම තීරණය ගැනීමට සිදු වූ බවද ඔවුහු පවසති.
කෙසේවෙතත් මෙහිදි මූලිකව චෝදනා එල්ලවී තිබෙනුයේ ජාතික ජනබලවේගය පක්ෂයේ කුරුණෑගල දිස්ත්‍රික් නායක කෘෂිකර්ම නියෝජ්‍ය ඇමති නාමල් කරුණරත්න වෙතයි. ඔහු ප්‍රාදේශිය සම්බන්ධීකරණ කමිටුවකදී නීතිය අකුරට ක්‍රියාත්මක කළ වනජීවී නිලධාරී චතුර ගුණරත්න වෙත අභූත දේශපාලන චෝදනා එල්ල කර ඇති බව පැවසේ.
ඒ බව දැක්වෙන ප්‍රවෘත්ති ද සමාජ මාධ්‍ය තුළ සංසරණය වෙමින් ඇති අතර ඒ සම්බන්ධව සමාජ මාධ්‍ය ක්‍රියාකාරීන් , පරිසරවේදින් ජනාධිපති අනුර කුමාර දිසානායක, ශ්‍රීලංකා පොලිසිය ඇතුලු බලධාරීන්ගේ අවධානය යොමුකර ඇතත් මෙතෙක් කිසිඳු ක්‍රියාමාර්ගයක් ගෙන නොමැති බවද වාර්තා වෙයි.
එසේම ඒ මහතා සිදුකර ඇති පොලිස් පැමිණිලක් පවා නිසි ලෙස විභාගයට නොගෙන පොලිසිය පවා පක්ෂපාතී ලෙස කටයුතු කරන බවටද චෝදනා එල්ල වී තිබේ.
මෙවැනි පසුබිමක වනජීවී අපරාධ මැඩලීමට සහ නීතිය ක්‍රියාත්මක කිරීමට කැපවී කටයුතු කරන නිලධාරියෙකු ලෙස ගුණරත්න මහතාව හඳුන්වන පරිසරවේදීන් පෙන්වා දෙන්නේ, දූෂණය සහ වංචාව පිටුදැකීමට පැමිණි රජයක් හෝ පක්ෂයක් මෙවැනි නිලධාරීන්ට දඬුවම් කිරීමට , මානසික පීඩනයක් එල්ල කිරීම හෝ ජීවිත අවධානමේ හෙළීමට ඉඩ නොදිය යුතු බවයි.
“වනජීවී හා වෘක්ෂලතා ආඥාපනත නිසි පරිදි ක්‍රියාත්මක කිරීමට උත්සාහ කරන නිලධාරීන්ට බාධා කරන්නේ ඇයි?” යනුවෙන් ඔවුහු ආණ්ඩුවෙන් ප්‍රශ්න කරති.
