හැඩට වැඩට චරිත මවමින් පුංචි තිරයෙ විතරක් නොව සිනමාවේද දිගු ගමනක් යෑමට සිහින දකින ඇය පබසරා මධුෂානි. ඇය මේ දවස්වල ටෙලි නාට්‍ය කිහිපයකින් ඔබ හමුවට එනවා. පුංචි තිරයේ විතරක් නොව ප්‍රසංග වේදිකාවේදී ඒ මියුරු හඬ අවදි කරන පබසරා අද අප සමඟ ළෙන්ගතු වුණේ මේ විදියට.
මඩොල් කැලේ වීරයෝ තුළින් ඔබේ ලොකු වෙනසක් පේනවා නේද?
ඇත්තටම එහෙම වෙනසක් දැනුණා නම් මට ගොඩක් සතුටුයි. මොකද මම යෞවනත්වයත්, ආදරයත් පිරුණු පවුල් සහිත පසුබිම් ටෙලි නාට්‍ය නිර්මාණවල තමයි කලින් රඟපෑවේ. ඒ කටකාර චරිතවලින් මිදෙන්න මට ඕනෑ කළා. ඉතින් මම ප්‍රමිලා සුරංගි නිෂ්පාදකවරියට කතා කළා. ඇය මට ටෙලි නාට්‍ය ගැන පැහැදීමක් කළා. ඒ කියූ කාරණා එක්ක මගේ වෙනසට හොඳට අවස්ථාව මෙයයි කියලා මම මඩොල් කැලේ වීරයා ටෙලි නාට්‍යයට සම්බන්ධ වුණා.
හැබැයි අපිට හිතෙන විදියට මරිනා චරිතයට ලොකු ප්‍රතිචාරයක් නැතිව ඇති?
මොකද නැත්තෙ. මඩොල් කැලේ වීරයා සිරස ටෙලි නාළිකාවේ සවස 6.00ට විකාශය වෙනවා. මෙච්චර කාලයක් ළමයින් කාටුන් රස විඳින්න තමයි මඟ බලා හිටියේ. එහෙමත් නැතිනම් විදේශීය ටෙලි නාට්‍යයක් බලමින් රස විඳින්න ඇති. මඩොල් කැලේ වීරයා ගොඩ දෙනෙක් නරඹලා හොඳ ප්‍රතිචාර ලැබෙනවා.
ළමයින් එක්ක විතරද මේ දවස්වල පබසරා වැඩ කරන්නේ?
නැහැ. මම රඟපාපු ක්වින් ටෙලි නාට්‍ය ස්වර්ණවාහිනියේ විකාශය වෙනවා. හැබැයි වැඩිහිටි, බාල, මහලු හැමෝටම මේ ටෙලි නාට්‍ය දෙක වෙනුවෙන් හොඳ ප්‍රතිචාර ලැබෙනවා.
මරිනා තුළත් ආදරයක් ගලාගෙන යනවාද ඉදිරියේදී?
මරිනා ආදරය කරන්න යන්නෙ නැහැ. ඇය වැඩිපුරම පොඩි ළමයි එක්ක තමයි කාලය ගත කරන්නේ. මඩොල් කැලේ වීරයා නරඹන කොට ඒ වෙනස ඔයාලට දැනේවි.
මරිනා ආදරය නොකළාට පබසරා නම් දැන් ආදරය කරනවා ඇති?
ඇත්තටම මම දැන් පෙම්වතියක්. මම හොයපු හොඳ සහකරුවෙක් ලැබුණා. ඔහු මාව තේරුම් ගත්තා. ඔහුගෙන් මට කිසිම බාධාවක් නැහැ. කලාවයි, පෞද්ගලික ජීවිතයයි මම පටලගන්නේ නැහැ.
