මියගිය රෝගීන් ගණන ලක්ෂය ඉක්මවයි - ඇමරිකාව ඉතාලිය පසුකිරීමට සූදානම්..?

කොවිඩ් 19 වෛරසය හේතුවෙන් ලොවපුරා මියගිය පුද්ගලයන්ගේ ප්‍රමාණය ලක්ෂය ඉක්මවා තිබෙනවා. මේ වනවිට වාර්තා වන මරණ ප්‍රමාණය 102,607 කි.

අප්‍රේල් මස 02 වැනිදා මෙම වෛරසය හේතුවෙන් මියගිය පුද්ගලයන්ගේ ප්‍රමාණය 50,000 ඉක්මවූ අතර එතැන් පටන් දින 08 ක් ඇතුළත මරණ ප්‍රමාණය දෙගුණයක් බවට පත්ව තිබේ. මේ වනවිට දෛනිකව පුද්ගලයන් 5000 කට වැඩි පිරිසක් වෛරසයට බිලි වෙමින් තිබේ.

මේ අතර මෙතෙක් වාර්තා වී ඇති සමස්ත ආසාදිතයන්ගේ ප්‍රමාණය 1,647,635 ක් වන අතර ඉන් 1,178,259 ක් තවමත් ප්‍රතිකාර ලබමින් සිටී.

මෙතෙක් වැඩිම මරණ ප්‍රමාණයක් වාර්තා වී තිබෙන්නේ ඉතාලියෙනි. එම ප්‍රමාණය 18,849 ක් වන අතර ඇමරිකා එක්සත් ජනපදයේ පුද්ගලයන් 18,679 ක් වෛසරයට බිලි වී තිබෙනවා. මීට අමතරව ස්පාඤ්ඤයෙන් 15,970 ක්, ප්‍රංශයෙන් 12,210 ක්, සහ එක්සත් රාජධානියෙන් 8,958 ක් ලෙස මරණ වාර්තා වී තිබෙනවා. වෛසරය මුලින්ම හඳුනා ගත් චීනයෙන් මෙතෙක් වාර්තා වී තිබෙන්නේ මරණ 3336 කි.

ලොවපුරා රටවල් 210 කට වෛසරය ව්‍යාප්තව ඇති අතර ඉන් රටවල් බහුතරයකින්ම මරණ වාර්තා වේ.