ඉකුත් අගෝස්තු මාසයේ අන්තර්ජාලයට වීඩියෝවක් මුදාහරිමින් අද ලොව මුහුණ දෙන “කොරෝනා” වයිරසය සම්බන්ධයෙන් ප්‍රබල අනාවැකියක් කියූ ඉන්දීය දරුවා නැවත වීඩියෝවක් මුදාහරිමින් මෙම 2020 වසරේ දෙසැම්බර් 20දා මේ ලෝකයට මුහුණපෑමට වන තවත් දරුණු ව්‍යසනයක් ගැන හෙළිදරවු කර ඇති බව එරට මාධ්‍ය පවසනවා.
අභිග්‍යා ආනන්ද් (Abigya Anand) නමැති මෙ දරුවා පවසන්නේ ලබන වසරේ එනම් 2021 මාර්තු 31දා තෙක් එම අලුත් ව්‍යසනය බලපවත්වන බවයි. එය කොරෝනා වයිරස වසංගතයට වඩා බොහෝ දරුණු විය හැකි අතර ලෝකය තුළ වඩා ඛේදනීය තත්ත්වයක් ඇති කරනු ඇති බවත් අභිග්‍යා පවසනවා.
අනාගතයේ ඇතිවන මෙම දරුණු උවදුරුවලින් ආරක්ෂාවිය හැක්කේ මිනිසාගේ ප්‍රතිශක්තිකරණ පද්ධතියේ ශක්තිමත් බව මත පමණක් වන බව අභිග්‍යා අවධාරණය කරනවා.සත්ත්ව ඝාතන හා පරිසර විනාශයන් නැවැත්විය යුතු බවත්, එසේ නොවුණහොත් කර්මය ඉහළ ගොස් විපාක දෙමින් දරුණු ප්‍රතිඵල අත්කර දෙනු ඇති බවත් ඔහු කියා සිටිනවා.
සියලුම මාංස ව්‍යාපාරිකයන්ගෙන් ඉල්ලීමක් කරන අභිග්‍යා සියලුම සත්ත්ව ඝාතන නවතන ලෙසත් තම වෘත්තිය අතහරිමින් ලෝකය වෙනුවෙන් කැපකිරීමක් කරන ලෙස ඉල්ලා සිටිනවා.
මීට අමතරව ප්‍රතිශක්තිකරණ පද්ධතිය ශක්තිමත් කර ගැනීම සඳහා රසායනික ද්‍රව්‍ය නොයෙදූ ආහාර පරිභෝජනය කිරීමට, ප්‍රතිවයිරස අමුද්‍රව්‍ය (කුළුබඩු ආදී) ආහාරවලට එක් කර ගැනීමට, පරිසර හිතකාමී නිෂ්පාදන කෙරෙහි නැඹුරුවීමට, දේශීය ගොවියාට අතහිතදීමට හා කෘෂිකර්මාන්තය නඟා සිටුවීමටද අභිග්‍යා යෝජනා කරනවා.
ලෝකයේ පළමු කොරෝනා රෝගියා චීනයෙන් හමුවූයේ ජනවාරි 11 දා ලෙස ප්‍රකාශයට පත්වී ඇති අතර අභිග්‍යාගේ පළමු වීඩියෝව මුදාහැර ඇත්තේ ඉකුත් වසරේ අගෝස්තු 19දාය.
එසේ වුවත් Indian Times පුවත්පත මඟින් අභිග්‍යාගේ ජේ‍යතිෂ හැකියාවන් සම්බන්ධයෙන් අනාවරණය කර ඇත්තේ 2013 වසරේදී ඔහු හත් හැවිරිදි වියේ පසුවෙද්දීය. මේ වන විට ඔහු 14 හැවිරිදි වියේ පසුවනවා.
සිය පළමු වීඩියෝව මඟින් වසංගත තත්ත්වය මැයි 31 දා අවසන් විය හැකි බව සඳහන් කළත් ඔහුගේ දෙවැනි වීඩියෝවෙන් සඳහන් කරන්නේ මැයි මාසයේදී එය තරමක් අඩු වුවත් ජුනි මස 31 දා තෙක් ලෝකයට සුබදායක පණිවිඩයක් ඇසීමට නොලැබෙන බවයි.
