රට තුළ පවතින කොරෝනා වෛරස් තත්වය මැඩ පැවැත්වීමට ගත හැකි ක්‍රියාමාර්ග ඇතුළත් යෝජනා 3 ක් රජයේ වෛද්‍ය නිලධාරීන්ගේ සංගමය විසින් ජනාධිපති ගෝඨාභය රාජපක්ෂ මහතාට යොමු කර තිබෙනවා.
එහි පළමු යෝජනාව වන්නේ නිරෝධායනයට ලක් කෙරෙන සියලු පුද්ගලයන් විශේෂඥ කමිටුවක නිර්ණායක යටතේ පරීක්ෂා කිරීමයි.
එමගින් රෝගය වැළඳී ඇති පුද්ගලයන් රෝහල්වල හුදකලා කර ප්‍රතිකාර දිය හැකි බවටයි සංගමය යෝජනා කරන්නේ.
එහිදී ඔවුන් පවුලේ අනෙකුත් සාමාජිකයන් සහ සමාජය සමග සම්බන්ධවීම වැළැක්වෙනු ඇති බවයි රජයේ වෛද්‍ය නිලධාරීන්ගේ ස්ථාවරය වන්නේ.
ඔවුන්ගේ දෙවන යෝජනාව වන්නේ පරීක්ෂණවල සංවේදීභාවය සියයට 70 ක් පමණක් බැවින් නැවත නැවතත් පරීක්ෂා කිරීම් සිදුකල යුතුය යන්නයි.
මෙම ක්‍රමය ලෝක සෞඛ්‍ය සංවිධානය විසින්ද අනුමත කර ඇති බවයි රජයේ වෛද්‍ය නිලධාරීන්ගේ සංගමය පෙන්වා දෙන්නේ.
ඉදිරියේදී ගුවන් තොටුපළ විවෘත කිරීමෙන් පසු දිවයිනට පැමිණෙන්නන්ට වෛරසය වැළඳී නැතැයි තහවුරු කරගන්නා ලෙසද ඔවුන් නිරෝධායනයට යොමු කරන්නැයිද සංගමය ජනාධිපතිවරයාගෙන් ඉල්ලීමක් කරනවා. එය ඔවුන්ගේ 3 වන යෝජනාවයි.
එමගින් කොරෝනා වෛරසය රටට ඇතුලුවීම වළක්වා ගත හැකි බවයි රජයේ වෛද්‍ය නිලධාරීන්ගේ සංගමය අවධාරණය කරන්නේ.
