ලෝක කුසලාන ජයග්‍රාහී නායක අර්ජුන රණතුංග මහතාගෙන් ශ්‍රී ලංකාවේ ක්‍රිකට් ක්‍රීඩාවේ දියුණුවට සහයෝගය දෙන ලෙස ක්‍රීඩා අමාත්‍ය නාමල් රාජපක්ෂ මහතා ඉල්ලා තිබෙනවා.
මාතාර හි මාධ්‍යවේදීන් අමතමින් ක්‍රීඩා අමාත්‍ය නාමල් රාජපක්ෂ මහතා කියා සිටියේ රටේ ඕනෑම ක්‍රීඩාවක් දේශපාලනයෙන් තොර විය යුතු බවයි.
විවිධ කමිටු පත් කිරීමෙන් ක්‍රීඩා පිටියේ පවතින ගැටලු විසඳන්නේ නැති බව සඳහන් කරමින් ක්‍රීඩා අමාත්‍යවරයා කියා සිටියේ එවැනි සමහර කමිටු ප්‍රගතියට බාධාවක් වී ඇති බවයි.
ශ්‍රී ලංකා හිටපු ශ්‍රේෂ්ඨ ක්‍රීඩක අර්ජුන රණතුංග මහතා 2020 ලංකා ප්‍රිමියර් ලීග් තරගාවලියට අදාළව ඔහුට බොහෝ වටිනා උපදෙස් ලබා දී ඇති බවත්, ඒවායින් බොහොමයක් තරඟාවලිය තුළ ක්‍රියාත්මක වූ බවත් අමාත්‍ය නාමල් රාජපක්ෂ මහතා තවදුරටත් අනාවරණය කළා.
2015 න් පසු ක්‍රිකට් ක්‍රීඩාව දැඩි ලෙස දේශපාලනීකරණය වී ඇති බව පෙන්වා දුන් ක්‍රීඩා අමාත්‍යවරයා, 2015 ට පෙර ලොව පුරා උත්කර්ෂයට නැංවූ ජාතික කණ්ඩායම එම වසරෙන් පසු සැලකිය යුතු ලෙස පිරිහී ඇති බව ද එහිදී පැවසුවා.
ක්‍රිකට් ක්‍රීඩාවට අදාළ වර්තමාන තත්ත්වය නිවැරදි කිරීම හා වැඩිදියුණු කිරීම සඳහා දිගුකාලීන සැලසුම් සකස් කර ඇති අතර ක්‍රීඩාවේ අනාගත ප්‍රගතියට බාධා කිරීමට බලපෑමක් ඇති නොවන බවට තවදුරටත් සහතික වී ඇති බවයි ක්‍රීඩා අමාත්‍ය නාමල් රාජපක්ෂ මහතා පැවසුවේ.
