ශ්‍රී ලංකා ක්‍රිකට් කණ්ඩායමේ හිටපු උපනායක කුසල් මෙන්ඩිස්, ධනුෂ්ක ගුණතිලක සහ නිරෝෂන් දික්වැල්ලට වසර දෙකක ක්‍රිකට් තහනමක් පනවා තිබෙනවා.
ඒ, නිමාවූ එංගලන්ත සංචාරයේදී ජෛව බුබුල කඩමින් විනය විරෝධී ලෙස හැසිරීමේ චෝදනා යටතේ ක්‍රිකට් ආයතනය විසින් පත්කල පංච පුද්ගල කමිටුවේ නිර්දේශ අනුවයි.
ඒ අනුව කුසල් මෙන්ඩිස් වෙත ඇමෙරිකානු ඩොලර් 25,000ක දඩයක් පනවා තිබෙනවා.
ශ්‍රී ලංකා කණ්ඩායමේ කඩුලු රකින ක්‍රීඩක නිරෝෂන් දික්වැල්ලට මාස 18ක තහනමක් සහ ඇමෙරිකානු ඩොලර් 25,000ක දඩයක් පැනවීමටයි අදාල කමිටුව නිර්දේශ කර ඇත්තේ.
ඔහුගේ පළමු වරද මෙය වීම හේතුවෙන් දික්වැල්ලට තහනම යම්තාක් දුරකට අඩු කර තිබීම විශේෂත්වයක්.
මෙම ක්‍රීඩකයන්ට එරෙහි විනය පරීක්ෂණය ශ්‍රී ලංකා ක්‍රිකට් ආයතනයේදී අද පැවැත්වුණේ එම විමර්ශන ක්‍රියාවලිය මෙහෙයවීම සඳහා පත් කළ පංච පුද්ගල කමිටුව හමුවේයි.
මෙම කමිටුව අද දිනයේදීම අදාළ පරීක්ෂණයේ වාර්තාව ශ්‍රී ලංකා ක්‍රිකට් ආයතනය වෙත භාරදී ඇති අතර, ඒ අනුව වහාම ක්‍රියාත්මක වන පරිදි එහි ඇතුළත් නිර්දේශ ක්‍රියාත්මක කිරීමට නියමිතව තිබෙනවා.
