2025.04.29 වන දින පැය 1630 ට පමණ කොටහේන පොලිස් වසමේ අංක 36, ගල්පොත්ත වීදිය, EXPO මහල් නිවාස සංකීර්ණයේ පදිංචිව සිටි වයස අවුරුදු 15 ක දැරියක් එම මහල් නිවාස සංකීර්ණයෙන් බිමට පැන ඇති බවට කොටහේන පොලිස් ස්ථානයට ලද දුරකථන පණිවිඩයක් මත විර්මශන ආරම්භ කර තිබුණි.
සිදු කරන ලද විමර්ශනයේදී මෙම දැරිය බම්බලපිටිය ප්‍රදේශයේ කාන්තා විද්‍යාලයක අධ්‍යාපනය ලබා පසුව කොට හේන ප්‍රදේශයේ කාන්තා විද්‍යාලයක අධ්‍යාපනය හදාරමින් සිටියදී ඉහත සිදුවීම සිදු වී ඇති බවටත්, බම්බලපිටිය ප්‍රදේශයේ පාසලේ අධ්‍යාපනය හදාරන කාලය තුලදී එම පාසලේ ගුරුවරයෙකුගෙන් ලිංගික අතවරයකට ලක් වී ඇති බවට අනාවරණය වී ඇත.
මේ සම්බන්ධයෙන් 2024.12.08 වන දින බම්බලපිටිය පොලිස් ස්ථානයට ලැබුණු පැමිණිල්ලක් මත විමර්ශනයක් ආරම්භ කර සැකකාර ගුරුවරයා 2025.01.08 වන දින අත්අඩංගුවට ගෙන අළුත්කඩේ අංක 03 ගරු මහෙස්ත්‍රාත් අධිකරණයට ඉදිරිපත් කිරීමෙන් පසු 2025.01.10 වන දින දක්වා රක්ෂිතබන්ධනාගාර ගතකර පසුව ඇප මත මුදා හැර ඇත.
සැකකරු විදේශ ගමන් තහනමකටද ලක් කර ඇත. මෙම නඩුව 2025.05.19 වන දින නැවත කැඳවීමට නියම කර ඇත.
දැරියගේ මරණයෙන් පසු 2025.05.06 වන දින ළමා හා කාන්තා අපයෝජන නිවාරණ හා විමර්ශන කාර්යංශයේ 109 දරන හදිසි දුරකථන අංකයට තුන්වන පාර්ශවයක් විසින් මෙම දැරිය සහභාගි වූ උපකාරක පන්තියකදී එම ආයතනය පවත්වාගෙන යනු ලබන පුද්ගලයා විසින් දරුවන් ඉදිරියේ එම දැරිය දැඩි මානසික පීඩනයට පත් කර ඇති බවත්, ඒ හේතුවෙන් මෙම සිසුවිය සිය දිවි නසා ගැනීමට පෙළඹුණු බවටත්, සඳහන් කරමින් පැමිණිල්ලක් ඉදිරිපත් කර ඇත. ඒ අනුව එම කාර්යංශය මඟින් ගරු අධිකරණයට කරුණු වාර්තා කර ඇති අතර වැඩිදුර විමර්ශන සිදු කරමින් පවති.
ළමා හා කාන්තා අපයෝජන නිවාරණ හා විමර්ශන කාර්යංශය හා බම්බලපිටිය පොලිසිය මඟින් වැඩිදුර විමර්ශන සිදු කරනු ලබයි.
