සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
මෑතකදී ඇති වූ සුළි කුණාටු ආපදාව අතරතුර කොත්මලේ ජලාශයේ වාන් දොරටු විවෘත කිරීම සම්බන්ධයෙන් එල්ල වූ දැඩි චෝදනා පිළිබඳව ජනාධිපති අනුර කුමාර දිසානායක මහතාගේ ප්රධානත්වයෙන් පැවති නුවරඑළිය දිස්ත්රික් සම්බන්ධීකරණ කමිටු රැස්වීමේදී අවධානය යොමු විය.
එහිදී අදාළ ජලාශය භාර ප්රධාන වාරි ඉංජිනේරුවරයා ජනාධිපතිවරයා හමුවේ කරුණු පැහැදිලි කළේය.
ඉංජිනේරුවරයා පැහැදිලි කළ පරිදි, ඔක්තෝබර් 27 වන දින ජලාශයට පැමිණි ජල පහර වේල්ලට දරාගත නොහැකි මට්ටමක තිබුණි. එම දිනයේදී තත්පරයට ඝන මීටර් 2720ක් තරම් විශාල ජල ප්රමාණයක් පැමිණි අතර, එය ඉතිහාසයේ වාර්තා වූ විශාලතම ජල ප්රමාණය විය. වේල්ල ආරක්ෂා කර ගැනීම අවශ්ය වූ හෙයින්, ඔවුන් එම ජලය මුදා හැරීමට කටයුතු කළ බව ඔහු සඳහන් කළේය.
පසුව, 28 වන දින වන විට ජල මට්ටම අඩු වූ බැවින් වාන් දොරටු වසා දැමූ අතර, එදින සවස් වන විට ජල මට්ටම නැවතත් පිටාර මට්ටමට කිට්ටු විය. එම අවස්ථාවේදී පැමිණෙන ජලය පිටතට දැමීම සඳහා ඔවුන් දොරටු විවෘත කළේ සුළු ප්රමාණයකින් පමණි.
මෙහිදී තත්පරයට ඝන මීටර් 170ක් පමණ ජල ප්රමාණයක් මුදා හැර ඇති අතර, එය ගංවතුර තත්ත්වයක් නොවන බවද ඉංජිනේරුවරයා අවධාරණය කළේය.
දොරටු ක්ෂණිකව විවෘත කළ බවට එල්ල වන මතයන් ඔහු ප්රතික්ෂේප කළ අතර, ජල මට්ටම දරාගත නොහැකි වූ විට ඔවුන් පියවරෙන් පියවර ජලය මුදා හැරීමට කටයුතු කළ බව පැවසීය. තවදුරටත් අල්ලාගෙන සිටියේ නම්, ඊට වඩා විශාල ප්රමාණයකින් දොරටු විවෘත කිරීමට සහ විශාල ජල ප්රමාණයක් මුදා හැරීමට සිදුවන බවද ඔහු කමිටුවට දැන්වීය. ජලාශය පැය 24 පුරාම අධීක්ෂණය කරමින් මෙම කටයුතු සිදු කරන බවද ඔහු තහවුරු කළේය.
වාන් දොරටු විවෘත කිරීමට පෙර අනුගමනය කරන සම්ප්රදාය පිළිබඳව ජනාධිපතිවරයා විමසූ විට, ඉංජිනේරුවරයා සඳහන් කළේ, ඔවුන් සයිරන් හඬවා ක්රියාත්මක කරන බවයි. දොරටු විවෘත කිරීමට විනාඩි 10කට පෙර නලාව හඬවන අතර, දොරටු විවෘත කරන විට නැවත වරක් නලාව හඬවනු ලැබේ.
මෙම නලාව හඬවනු ලබන්නේ, ස්පිල් ගේට්ටු වසා ඇති අවස්ථාවලදී ගඟට පැමිණ මාළු ඇල්ලීම හෝ ගඟ නැරඹීම වැනි වෙනත් ක්රියාකාරකම්වල යෙදෙන පුද්ගලයන් එම ප්රදේශවලින් ඉවත් කිරීම සඳහා බව ඔහු පැහැදිලි කළේය. මෙය ඔවුන්ගේ අත්පොත්වල සඳහන් වන දිගටම කරගෙන යන ක්රියා පටිපාටියක් බවද ඔහු කියා සිටියේය.
ජනාධිපතිවරයා විමසා ඇත්තේ, "තව පැය භාගයකින් හෝ පැයකින් දොරටු ඇරිය යුතු බව" කලින් හඳුනා ගැනීමේ අවස්ථාවක් නොතිබේද යන්නයි.
ඊට පිළිතුරු දෙමින් ඉංජිනේරුවරයා පැවසුවේ, එය ජලය පැමිණෙන ආකාරය මත රඳා පවතින බවත්, සමහර අවස්ථාවලදී විදුලි උත්පාදනය සිදුවුවහොත් ජල මට්ටම එකවරම පහත වැටීම හේතුවෙන් ජල පහර ක්ෂණිකව නතර වන බවත්ය. එම නිසා ජලය මුදා හැරීමට ඇත්තේ විනාඩි 10ක පමණ කෙටි කාලයක් බවද ඔහු සඳහන් කළේය
