අප රටේ මේ වන විට උද්ගත වී වසංගත තත්වයත් සමග තමාගේ මෙන්ම අනෙක් අයගේ ආරක්ෂාව උදෙසා තමන්ට අවශ්‍ය බොහෝ ද්‍රව්‍ය මිලදී ගැනීම සඳහා බෙහොමයක් දෙනා අන්තර්ජාලය වෙත නැඹුරුවීමක් දක්නට ලැබෙනවා. මෙය අවස්ථාවක් කර ගනිමින් ඇතැම් පුද්ගලයින් වංචනික ලෙස ජනතාව රවටමින් මුදල් ඉපයීමේ කාර්යයෙහි නිරත වන බවට නිරීක්ෂණය වී ඇති බව පාරිභෝගික සේවා අධිකාරිය පවසනවා.
ඔවුන් වෙත, විශේෂයෙන් freshcart.lk ආයතනය සම්බන්ධයෙන් පැමිණිලි රාශියක් ලැබී තිබුණු නිසා වහාම ක්‍රියාත්මක වූ පාරිභෝගික කටයුතු පිළිබඳ අධිකාරියේ විමර්ශන නිලධාරීන් අද (15) උදෑසන එම ආයතනය වැටලීමට කටයුතු කර තිබෙනවා. කඩුවෙල පිහිටි ඔවුන්ගේ ලිපිනය ව්‍යාජ එකක් බව තහවුරු වී ඇති අතර අතර, එම ආයතනයේ වාහනයක් මාර්ගයෙන් අදාළ නිවැරදි ලිපිනය සොයාගෙන තිබෙනවා.
වැඩිදුරටත් විමර්ශනය කිරීමේදී අනාවරණය වී ඇත්තේ එම ආයතනයට ලැබෙන ඇනවුම් වැඩි කර ගැනීමේ අදහසින් ලැබී ඇති ඇනවුම් චේතාන්විතව යැවීම ප්‍රමාද කර ඇති බවයි. එසේම, ඔවුන්ගේ සියලුම භාණ්ඩ අනුමත මිලට වඩා වැඩියෙන් අලෙවි කරන බවත් අනාවරණය වී තිබෙනවා. ඇතැම් ආහාර ද්‍රව්‍ය පරිභෝජනයට නුසුදුසු වන පරිදි කල්ඉකුත් වී තිබෙනවා.
ඔවුන් භාර ගත් සියලුම ඇනවුම් කඩිනමින් ලබා දෙන ලෙසත් වැඩිපුර අය කරගත් මුදල් කුමන හෝ ක්‍රමයකින් ආපසු පාරිභෝගිකයන් වෙත ලබා දෙන ලෙසත් අධිකාරියේ නිලධාරීන් විසින් නියෝග කළ අතර, අදාළ පුද්ගලයන්ට එරෙහිව මාලිගාකන්ද මහේස්ත්‍රාත් අධිකරණයේ නඩු පැවරීමට නියමිතයි.
සභාපති විශ්‍රාමික මේජර් ජෙනරල් ශාන්ත දිසානායක මහතාගේ උපදෙස් මත, පාරිභෝගික කටයුතු හා තොරතුරු අංශයේ අධ්‍යක්ෂ අසේල බංඩාර මහතාගේ මෙහෙයවීම මත, බස්නාහිර පළාත් සහකාර අධ්‍යක්ෂ ඒ.ඒ. ජසූර් මහතා සහ ප්‍රධාන කාර්යාලයේ විමර්ශන නිලධාරී දමින්ද කුමාර යන නිලධාරින් දෙදෙදනා විසින් මෙම වැටලීම සිදු කර තිබෙනවා.
