දෙරණ රූපවාහිනී නාලිකාවෙහි සජීවී දේශපාලන සංවාදයක් අතරතුර ජාතිවාදී අදහස් ප්‍රකාශ කිරීම සඳහා ශ්‍රී ලංකා පොදුජන පෙරමුණේ හිටපු රාජ්‍ය අමාත්‍ය මහින්දානන්ද අලුත්ගමගේ මහතාට අවස්ථාව ලබාදීම වෙනුවෙන් තමන්ට වෙනම ගෙවීමක් ලැබිය යුතු බව එම සංවාදය මෙහෙයවූ නිවේදක චතුර අල්විස් මහතා පවසන ආකාරය දැක්වෙන වීඩියෝවක් අන්තර්ජාලයෙහි සංසරණය වෙමින් පවතී.
සජීවී විකාශය අතරතුර වෙළඳ දැන්වීම් ප්‍රචාරණය සඳහා ලබාගත් විවේකයක් අතරතුර චතුර අල්විස් මහතා ජාතිවාදී පදනමෙන් ප්‍රහාර එල්ල කළ යුතු බව අවධාරණය කරන අයුරු දැක්වෙන මෙම වීඩියෝව විනාඩි දෙකක පමණ කාලයකින් යුක්ත වන අතර එය අත්වැරදීමකින් ප්‍රචාරණය වූ එකක් බව ද කියැවේ.
කොරෝනා වෛරස් ව්‍යාප්තිය සම්බන්ධයෙන් වරද මුස්ලිම් ජාතිකයින් වෙත පටවා අමු අමුවේ ජාතිවාදය ඇවිස්සීමේ ක්‍රියාවලියක් දියත් වෙමින් පවතින බව අපි මීට දින කිහිපයකට ඉහතදීම පෙන්වා දුන්නෙමු. ශ්‍රී ලංකා පොදුජන පෙරමුණේ සමාජ මාධ්‍ය ජාල ක්‍රියාකාරිකයින් විසින් එම පක්ෂයේ සාමුහික තුළ ගෙනගිය මෙම ප්‍රචාරණ යාන්ත්‍රණය ඉතා සාර්ථක ලෙස ජාතික මට්ටමේ විද්‍යුත් මාධ්‍ය කරා ගෙන ඒම චතුර + මහින්දානන්ද + දිලිත් හවුල විසින් සිදුකර තිබෙන බව පෙනේ.
පසුගිය ජනාධිපතිවරණයේදී ගෝඨාභය රාජපක්ෂ මහතාගේ සම්පූර්ණ ප්‍රචාරණ ව්‍යාපාරය මෙහෙයවූයේ දෙරණ මාධ්‍ය ජාලය විසිනි. ඔවුන් එහිදී ද අසත්‍ය පුවත්, සදාචාරාත්මක නොවන ප්‍රචාරණයන්, නීතිවිරෝධී ප්‍රචාරණයන් යන සියලුම උපක්‍රම භාවිතා කළ අතර එම ජනාධිපතිවරණ ප්‍රචාරණ ව්‍යාපාරයෙහි මූ‍ලික පදනම වූයේ ද මුස්ලිම් විරෝධයයි. මෙවර කැඳවා ඇති මහමැතිවරණයේදීත් පොහොට්ටුවේ ප්‍රචාරණ ව්‍යාපෘතිය සිදුකරන්නේ දෙරණ විසින් වියයුතු අතර ඔවුන් දැන්ම තියා ඊට අදාළ පසුබිම සියලු සදාචාර සහ මනුෂ්‍ය මානයන් බිඳහෙළමින් සකස් කරන ආකාරය මින් පෙන්නුම් කෙරේ.
මෙවන් ව්‍යසන අවස්ථාවක දේශපාලනය නොකරන්නැයි විපක්ෂයට කියනා අතරතුරම කොරෝනා ව්‍යාප්තිය දේශපාලන සූදුවක් බවට පත්කර ගැනීම සඳහා ආණ්ඩු පාර්ශ්වයෙන් ගෙනයන මේ වෑයම සම්බන්ධයෙන් ගත් කළ දෙරණේ චතුරගේ සිට ආණ්ඩුවේ ඉහළම පුද්ගලයින් දක්වා කිසිවෙකුත් අහිංසක නැත. දෙරණ යනු ආණ්ඩුවේ ප්‍රචාරණ මෙහෙයුම් සැලසුම් කරන ආයතනයයි. මහින්දානාන්ද අලුත්ගමගේ යනු ආණ්ඩුවේ හිටපු මාධ්‍ය ප්‍රකාශකවරයාය. කොරෝනා ව්‍යාප්තිය නිසි ලෙස මැදිහත්ව මැඬපවත්වනවාට වඩා එය ජාතිවාදී පදනමෙන් දේශපාලන ආයෝජනයක් බවට පෙරළා ගැනීමට එළිපිටම උත්සාහ කිරීම යනු අතිශයින්ම තුච්ඡ, නින්දිත, පාහර, අධම, අමන, දුෂ්ඨ, කෲ‍ර ... විස්තර කිරීමට වචන නොමැති තරම් පහත් ක්‍රියාවකි.
රටට ආදරය කිරීම, දේශප්‍රේමය, රට බේරාගැනීම, වීරත්වය, රට හැදීම, වැඩ කිරීම කියන්නේ මේකටදැයි ඔවුන් පැහැදිලි කළ යුතුව තිබේ. මීට අදාළ සියලුම පාර්ශ්වයන්ගෙන් අප නැවත නැවතත් ඉල්ලා සිටින්නේ රට බරපතළ ව්‍යසනයක මුවවිටෙහි තිබියදී එය නොසලකා බලය වෙනුවෙන් ජාතිවාදය ඇවිස්සීම කරුණාකර දැන්වත් නතර කරන ලෙසය. මුදල් වෙනුවෙන්, බලය වෙනුවෙන් ඔබ මේ හිතාමතා වනසන්නේ රටේ අනාගතයයි.
