කොරෝනා ආසාදිතයෙකු ලෙස ඊයේ (20) පිළියන්දල නිවන්තිඩිය ග්‍රාමෝදය මාවතේ පදිංචිව සිටිය දී හමුවූ 33 හැවිරිදි මාළු ව්‍යාපාරිකයාට ආසාදනය වන්නට ඇත්තේ ඕස්ට්‍රේලියාවේ සිට පසුගිය මාර්තු 14 වනදා ලංකාවට පැමිණි ඔහුගේ සහෝදරයාගෙන් බවට සැක කෙරෙනවා.
සහෝදරයාට තවමත් කොරෝනා ලක්ෂණ පෙන්වා නැති අතර ඕස්ට්‍රේලියාවේ සිට ආ අවස්ථාවේ ලංකාවේ නිරෝධායන වැඩසටහනට දායක වී දින 14 ක් නිවසේ ගත කළ බවද වාර්තා වනවා.
පිළියන්දල සෞඛ්‍ය වෛද්‍ය නිලධාරී ඉන්දික එල්ලාවල මහතා සඳහන් කළේ මෙම විදේශයේ සිට පැමිණි පුද්ගලයා නිරෝධායන කාලයේ ආශ්‍රිතයින් 5 ක් සිටින බවත් ඔවුන්වද ඔහු සමග පරීක්ෂණ සදහා යොමු කළ බවත්ය.
නිරෝධායනය අවසන් කළ පසු ඔහුට රෝග ලක්ෂණ නොපෙන්වූ නිසා ඔහු රෝගයක් නැතැයි සිතා අවට නිවාසයකට ගොස් තිබූ බවත් එම නිවසේ අයද දැන් නිරෝදායනයට යොමු කර ඇති බවත් වෛද්‍ය එල්ලාවල සඳහන් කළා.
මේ අතර ආසාදිත මාළු ව්‍යාපාරිකයා පොල්ගස්ඕවිට මාළු වෙළෙදසලක් මගින් පසුගිය කාලයේ නිවාස වලට මාළු ලබාදීමේ ජංගම ව්‍යාපාරයක් පවත්වාගෙන ගිය බවත් වාර්තා වනවා.
එම පුද්ගලයා මාළු මිලට ගන්නට පෑලියගොඩ මාළු වෙළෙද පොලට දින 2ක් ගොස් තිබී ඇති බවද ඒ ගැන පරීක්ෂාකාරී වන බවද වෛද්‍ය එල්ලාවල සඳහන් කළා.
