ඊයේ (03) දිනයේදී වාර්තා වූ කොරෝනා ආසාධිත රෝගීන් 13 දෙනා ගෙන් 11 දෙනෙක් නාවික හමුදාවේ සෙබළුන් බව යුධ හමුදාපති ලුතිනන් ජනරාල් ශවේන්ද්‍ර සිල්වා ප්‍රකාශ කර සිටිනවා..
මෙම සෙබළුන් වැලිසර නාවික හමුදා කඳවුරේ සිට නිවෙස් බලා ගොස් පැමිණි අය බවයි මෙහිදී යුධ හමුදාපතිවරයා කියා සිටියේ.
එමෙන්ම අනෙක් රෝගීන් දෙදෙනා කොරෝනා ආසාධිත නාවික හමුදා සෙබළුන් ඇසුරු කරන ලද ඔවුන්ගේ ඥාතියෙක් සහ මිතුරෙක් බව හමුදාපතිවරයා සඳහන් කළා.
මේ වන විට නාවික හමුදා සාමාජිකයින් සහ ඔවුන් ඇසුරු කළ පුද්ගලයින් සංඛ්‍යාව 324 දෙනෙක් කොරෝනා වෛරසය ආසාධනය වී ඇති බවයි සෞඛ්‍ය අමාත්‍යාංශයේ දත්ත පෙන්නුම් කර සිටින්නේ.
ඊයේ රාත්‍රියේ වන විට මෙරටින් වර්තා වන කොරෝනා ආසාධිත රෝගින් සංඛ්‍යාව 718ක් ලෙස වාර්තා වුනා. එමෙන්ම කොරෝනා ආසාධනය වූ රෝගීන් ගෙන් 184 දෙනෙක් සුවය ලබා රෝහලෙන් පිටව ගොස් ඇති බවයි වසංගත රෝග විද්‍යා අංශය සඳහන් කර සිටියේ.
එමෙන්ම ඉකුත් අප්‍රේල් මස 22 වෙනිදා සිට ඊයේ දින රාත්‍රිය වන විට මෙරටින් වාර්තා වූ කොරෝනා ආසාධිතයින් සංඛ්‍යාව 407ක් වනවා.
