කොවිඩ් ආසාදනය වී ඇති අම්පේගම ඌරමලහේන පදිංචි පුද්ගලයා කොළඹ සිට ඇල්පිටිය දක්වා පැමිණි බස් රථයේ කොන්දෝස්තරවරයාට ලබාදී ඇත්තේ ව්‍යාජ දුරකථන අංකයක් සහ ව්‍යාජ නමක් බවට අනාවරණය වී තිබෙනවා.
පොලිසිය විසින් කරන ලද විමර්ශනවලදී අනාවරණය වී ඇත්තේ ඔහු ඉකුත් 29 වැනිදා කොළඹදී පී.සී.ආර්. පරීක්ෂණය සිදු කිරීමෙන් පසු කොළඹ සිට දක්ෂිණ අධිවේගී මාර්ගයේ බස් රථයකින් පස්වරු 6.30 ට පමණ ඇල්පිටියට පැමිණ ඥාතියකුගේ යතුරු පැදියකින් අම්පේගම නිවසට ගොස් ඇති බවයි.
මේ දිනවල දුර ගමන් සේවාවල සහ අධිවේගී මාර්ගයේ ගමන් ගන්නා මගීන්ගේ ආරක්ෂාව වෙනුවෙන් ඔවුන්ගේ නම් සහ දුරකථන අංක කොන්දොස්තරවරයා විසින් ලියා ගැනීම සිදු කෙරෙනවා.
ඒ අනුව ඔහු පැමිණි බස් රථයේ කොන්දොස්තරවරයාද බස් රථයේ සිටි මගීන්ගේ නම් සහ දුරකථන අංක ලියාගෙන ඇති අතර එම අවස්ථාවේ බස් රථයේ ඔහු සමග මගීන් විසිපස් දෙනකු සිට තිබෙනවා.
ඔහුට කොරෝනා ආසාදනය වී ඇති බවට 31 වැනිදා වාර්තාව ලැබීමෙන් පසු එම බස් රථයේ කොන්දොස්තර සහ රියැදුරු සොයාගෙන පොතේ ලියා තිබූ දුරකථන අංකවලට සෞඛ්‍ය නිලධාරීන් සහ පොලිස් නිලධාරීන් කතා කළත් ඔහු විසින් ලියා ඇත්තේ ව්‍යාජ නමක් සහ දුරකථන අංකයක් බවට අනාවරණය වුණා.
පසුව පොලිසිය විසින් කරන ලද ප්‍රශ්න කිරීමේදී තමා ව්‍යාජ නමක් සහ දුරකථන අංකයක් ලියූ බව ඔහු පිළිගෙන තිබුණා.,
මේ සම්බන්ධයෙන් බද්දේගම පොලිස් ස්ථානාධිපති ප්‍රධාන පොලිස් පරීක්ෂක ප්‍රභාත් දේශබන්දුගෙන් විමසීමේදී කියා සිටියේ ඔහු අසත්‍ය තොරතුරු ලබාදී ඇති බවට තහවුරු වුවහොත් ඔහුට එරෙහිව පියවර ගන්නා බවයි.
