ලිසිං ගෙවීම පැහැර හැරි වාහනයක වාහන හිමියෙකුගේ, දස හැවිරිදි පුතුගේ ගෙලමිරිකා මරණ තර්ජනය එල්ල කොට වාහනය පැහැර ගත් සීසර්වරයා හඳුනා ගැනීමේ පෙරට්ටුවකට ඉදිරිපත් කිරීම සඳහා ජුලි මස 02 වෙනි දින දක්වා රක්‍ෂිත බන්ධනාගාර ගත කිරීම මීගමුව ප‍්‍රධාන මහෙස්ත‍්‍රාත් ටී. එන්. එල් මහවත්ත මහත්මිය නියෝග කර තිබෙනවා.
2021 මැයි මස 8 වෙනිදිනවූ මෙම සිද්ධියෙන් පසු පොලීසිය මග හැර සැඟවී සිටි සැකකරු මීගමුව කොට්ඨාස අපරාධ විමර්ශන අංශය මගින් අත්අඩංගුවට ගෙන තිබෙනවා.
මෙම සිද්ධියෙන් පසු සැඟව සිටියදී මීගමුව අපරාධ කොට්ඨාසය මගින් අත්අඩංගුවට ගෙන රිමාන්ඞ්භාරයට පත් කළ සැකකාර සීසර්වරයා වුයේ කොච්චිකඬේ පළඟතුරේ, තක්කියා පාරේ පදිංචි මාකස් නිව්ටන් කමල්රාජ් නැමැත්තෙක්.
මෙම සිද්ධියට මුහුණ දුන් පැමිණිලිකාර ව්‍යාපාරිකයා කොච්චිකඬේ ප‍්‍රදේශයේ පදිංචිකරුවෙක් වන අතර ඔහුගේ වාහනයේ ලිසිං ගෙවීම පැහැර හැර තිබුණා.
ව්‍යාපාරිකයා තම බිරිඳ සහ කුඩා දරුවා සමග වාහනයෙන් අවශ්‍යතාවයක් සඳහා යමින් සිටියදී අතරමගදී මෙහි සැකකරු ඇතුළු පිරිසක් වාහනය පැහැර ගැනීමට උත්සාහ කර තිබෙනවා.
ඊට විරෝධය දැක්වූ වාහන හිමියා පොලිසියට යෑමට අවශ්‍යය බව පැවසූ අවස්ථාවේ එම වාහනයේ සිටි කුඩා දරුවා වාහනයෙන් ඉවතට ගෙන දරුවාගේ ගෙල මිරිකා මරණ තර්ජන එල්ල කොට වාහන පැහැරගත් බව පැමිණිල්ලේ දැක්වෙනවා.
දරුවාගේ ගෙල මිරිකා බාලවයස්කාර දරුවෙකුට අඩන්තේටම් කිරීම, මංකොල්ලකෑමට තැත්කිරීම, මරණ තර්ජන එල්ල කිරීම සැකකරුට එරෙහිව එල්ලවූ චෝදනා වේ. මෙම සිද්ධිය අදාලව තවත් සැකකරුවන් තිදෙනෙකු අත්අඩංගුවට ගෙන ඇති අතර වාහන ලිසිං සමාගමේ කළමණාකරු අත්අඩංගුවට ගෙන පසුව ඇප මත මුදාහැර තිබෙනවා.
මීගමුව අපරාධ කොට්ඨාසයේ ස්ථානාධිපති පොලිස් පරීක්‍ෂක සම්පත් දිසානායක මහතා පැමිණිල්ල මෙහෙයවූවා.
වැඩිදුර විභාගය ජුලි මස 2 වැනි දින පැවැත්වීමට නියමිතයි.
