අදියර 04 ක් යටතේ පාසැල් ආරම්භ කිරීමට සූදානම් බව අධ්‍යාපන අමාත්‍යංශය පවසනවා.
ඒ සඳහා පාසැල් ආරම්භ කිරීමේ මූලික කටයුතු අද ආරම්භ කරමින් පාසැල් නිරීක්ෂණ කටයුතු සිදුකරන බවයි අමාත්‍යංශයේ ලේකම් මහාචාර්ය කපිල පෙරේරා මහතා සඳහන් කළේ.
වයස අවුරුදු 12ට අඩු ළමුන්ට එන්නත්දීම අවශ්‍ය නොමැති නිසා කොවිඩ් උවදුර සමනය වීමත් සමග පාසල් යළි විවෘත කිරීමේදී 01 සිට 05 ශ්‍රේණිවල පාසල් 3,884 ක් මුල් අදියර යටතේ ආරම්භ කිරීමට නියමිතයි.
එමෙන්ම තාක්ෂණික කමිටුවේ තීරණ ලැබුණු විගස අවුරුදු 12-15 ත් සහ 16-19 අතර වයස් කාණ්ඩවල ළමුන්, ළමාරෝග විශේෂඥ වෛද්‍යවරුන්ගේ පූර්ණ අනුමැතිය ඇතිව එන්නත් කිරීමට සූදානම් වනවා.
මේ අනුව ඉදිරි සතිය ඇතුළත අධ්‍යාපන හා සෞඛ්‍ය ක්ෂේත්‍රයට සම්බන්ධ පළාත්, දිස්ත්‍රික් සහ ප්‍රාදේශීය මට්ටමේ නිලධාරීන්ගෙන් ඒ ඒ පළාත්වල සහ දිස්ත්‍රික්ක වල නැවත පාසල් ආරම්භ කිරීමේ සූදානම ගැන විමසනු ලැබීමක් සිදු වනවා.
එම අදහස් සැලකිල්ලට ගනිමින් සෞඛ්‍ය අමාත්‍යාංශයේ උපදෙස් හා අධ්‍යාපන අමාත්‍යාංශයේ නිර්දේශ අනුව සංචරණ සීමා අවසන් වීමෙන් පසු පාසල් නැවත විවෘත කරන බවයි අධ්‍යාපන අමාත්‍යාංශයේ ලේකම්වරයා ප්‍රකාශ කළේ.
