ඉන්දියාව අපේ විශ්වාසවන්ත සහකරුවෙක්.. ඉන්දීය විරෝධය අවසන්.. අප දැන් උගන්වන්නේ සමාජවාදයට යන මාවතයි..

 

සම්පූර්ණ පුවත කියවන්න පහත "පුවත කියවන්න" බොත්තම ඔබන්න..

වරෙක ඉන්දියාව දැඩි ලෙස ප්‍රතික්ෂේප කළ සිය පක්ෂයේ ස්ථාවරය මේ වන විට සැලකිය යුතු වෙනසකට ලක්ව ඇති බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පසුගියදා ඉන්දියාවේ කළ සංචාරය පිළිබඳව අදහස් දක්වමින් පවසයි.

"The Hindu" පුවත්පත සමඟ පැවැත්වූ විශේෂ සම්මුඛ සාකච්ඡාවකදී ඔහු මේ බව සඳහන් කළේය.
2026 පෙබරවාරි 5 සිට 12 දක්වා ඉන්දියානු සංස්කෘතික සබඳතා කවුන්සිලයේ (ICCR) ආරාධනයකට අනුව ඉන්දියාවේ සංචාරය කළ ඒ මහතා, එහිදී එරට විදේශ කටයුතු අමාත්‍ය එස්. ජයශංකර් මහතා මෙන්ම ගුජරාට් සහ කේරළ ප්‍රාන්තවල මහ ඇමතිවරුන් ද හමුවිය.

සිය ප්‍රථම ඉන්දියානු සංචාරය පිළිබඳ අත්දැකීම් බෙදාගත් සිල්වා මහතා, ඉන්දියාව කෘෂිකර්මාන්තය, කිරි කර්මාන්තය සහ අභ්‍යවකාශ තාක්ෂණය යන ක්ෂේත්‍රවල ලබා ඇති ප්‍රගතිය අගය කළේය. "එස්. ජයශංකර් මහතා සමඟ පැවති සාකච්ඡාව ඉතා සුහදශීලී එකක් වූ අතර, ශ්‍රී ලංකාවේ ආර්ථිකය ගොඩනැගීමට මෙන්ම සුළි කුණාටුවෙන් සිදු වූ හානි අවම කර ගැනීමට ඉන්දියාව ලබා දුන් සහය පිළිබඳව අපි ස්තූතිය පළ කළා," යැයි ඔහු පැවසීය.

අතීතයේ ඉන්දියානු ව්‍යාප්තවාදය පිළිබඳව ජවිපෙ ඉගැන්වූ "පන්ති පහ" පිළිබඳව නැගූ ප්‍රශ්නයකට පිළිතුරු දෙමින් ලේකම්වරයා කියා සිටියේ, වර්තමාන දේශපාලන අධ්‍යාපන මොඩියුලයන් තුළ ඉන්දියාව පිළිබඳ එවැනි විශේෂිත හැදෑරීමක් නොමැති බවයි.

"අද වන විට අපේ පන්ති පහේ අන්තර්ගතය වන්නේ ආර්ථික අර්බුදය, ජාතික ගැටලුව, ලංකාවේ වමේ ව්‍යාපාරයේ ඉතිහාසය, සමාජවාදය කරා යන මාවත සහ බොල්ෂෙවික් පක්ෂයක් ගොඩනැගීමයි. කාලීන අවශ්‍යතා අනුව අපේ විෂය නිර්දේශයන් වෙනස් වී තිබෙනවා."

රටේ වත්මන් ආර්ථික තත්ත්වය පිළිබඳව අදහස් දක්වමින් ඔහු කියා සිටියේ රජය ඉතා වේගයෙන් ආර්ථිකය ස්ථාවර කර ඇති බවයි. ජාත්‍යන්තර මූල්‍ය අරමුදල සමඟ ඇති වැඩපිළිවෙළ පිළිබඳව අදහස් දක්වමින් ඔහු පවසා සිටියේ, "IMF ආයතනය ජනතා සුභසාධන කටයුතුවලට බාධා කරන්නේ නැහැ. අපේ දළ දේශීය නිෂ්පාදිතය වර්ධනය වන විට සහ ආර්ථිකය ශක්තිමත් වන විට වැටුප් වැඩි කිරීමට සහ සහන ලබා දීමට වැඩි ඉඩක් ලැබෙනවා," යනුවෙනි.

ඉන්දියානු සංචාරයේදී පළාත් සභා මැතිවරණය හෝ දහතුන්වන ආණ්ඩුක්‍රම ව්‍යවස්ථා සංශෝධනය පිළිබඳව කිසිදු සාකච්ඡාවක් සිදු නොවූ බවත්, අවධානය යොමු වූයේ සංවර්ධන සහයෝගීතාව පිළිබඳව පමණක් බවත් ඔහු අවධාරණය කළේය. ඊට අමතරව, චීනය සහ ඉන්දියාව යන දෙරටම ශ්‍රී ලංකාවේ වැදගත් සහකරුවන් බවත්, නොබැඳි විදේශ ප්‍රතිපත්තියක් යටතේ දෙරට සමඟම කටයුතු කරන බවත් ඔහු වැඩිදුරටත් කියා සිටියේය.