සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
පවතින බලශක්ති අර්බුදය හමුවේ රටේ ස්ථාවරත්වය පවත්වා ගැනීම සඳහා ඉන්ධන සහ විදුලිය උපරිම අයුරින් අරපිරිමැස්මෙන් භාවිතා කරන ලෙස ලංකා ඛනිජ තෙල් නීතිගත සංස්ථාවේ සභාපති D. J. රාජකරුණා මහජනතාවගෙන් ඉල්ලීමක් කරයි.
රට මුහුණ දී සිටින අසීරු තත්ත්වය සැලකිල්ලට ගෙන පාරිභෝගිකයන් දැඩි වගකීමකින් කටයුතු කළ යුතු බව හෙතෙම අවධාරණය කරයි.
පවතින ඉන්ධන සංචිත කළමනාකරණය කරගැනීම සඳහා අත්යවශ්ය නොවන ගමන් බිමන් සහ විනෝද චාරිකා සංවිධානය කිරීමෙන් හැකිතාක් වැළකී සිටින ලෙස සභාපතිවරයා ඉල්ලා සිටියි.
පෞද්ගලික වාහන භාවිතය අවම කර පොදු ප්රවාහනය දිරිමත් කිරීම තුළින් රටේ සමස්ත ඉන්ධන ඉල්ලුම පාලනය කිරීමට සහය වන ලෙස ඔහු වැඩිදුරටත් දන්වයි.
ඉන්ධන මත පදනම් වූ විදුලි උත්පාදනය සඳහා වැයවන පිරිවැය අවම කරගැනීමට නම්, නිවසේ හෝ සේවා ස්ථානයේ අනවශ්ය ලෙස දැල්වෙන විදුලි බුබුළක් හෝ නිවා දැමීමට කටයුතු කිරීම අතිශය වැදගත් බව රාජකරුණා මහතා පෙන්වා දෙයි.
"අප දැනට පරිභෝජනය කරන සෑම ඉන්ධන ලීටරයක් සහ සෑම විදුලි ඒකකයක්ම විදේශ විනිමය වැයකර ලබාගන්නා ඒවා බැවින්, එක විදුලි බුබුළක් හෝ නිවා දැමීමෙන් ඔබ රටේ ආර්ථිකයට සෘජු දායකත්වයක් ලබා දෙයි."
පවතින ඉල්ලුම සපුරාලීම සඳහා ඉන්ධන ආනයනය කිරීමේ ක්රියාවලිය අඛණ්ඩව සිදු කිරීමට සංස්ථාව උපරිම උත්සාහයක නිරත වන බවත්, ජනතාවගේ සහයෝගය ලැබෙන්නේ නම් මෙම අර්බුදකාරී කාලසීමාව වඩාත් පහසුවෙන් කළමනාකරණය කරගත හැකි වනු ඇති බවත් සභාපතිවරයා සිය නිවේදනය මගින් අවධාරණය කරයි.
