සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
2019 පාස්කු ඉරු දින මෙරටට එල්ල වූ ත්රස්ත ප්රහාරය හුදෙකලා සිදුවීමක් නොවන අතර 2017 සිට සිදුකරන ලද කුමන්ත්රණයක් බවට මේ වනවිට සිදු කරන ලද විමර්ශන ඔස්සේ අනාවරණය වී ඇති බව මහජන ආරක්ෂක ඇමති ආනන්ද විජේපාල පවසයි.
පාර්ලිමේන්තුවේ කල් තබන අවස්ථාවේ විවාදයට එක්වෙමින් ඔහු පෙන්වා දුන්නේ 2018 වසරේදී වව්නතිවු පොලිස් මුරපොළේ සේවය කළ පොලිස් නිලධාරීන් දෙදෙනා ඝාතනය කිරීමේ සිද්ධිය සම්බන්ධයෙන් වූ විමර්ශන නිසි ලෙස සිදු කර සැබෑ චූදිතයන් අත්අඩංගුවට ගත්තේ නම් පාස්කු ඉරිදා ත්රස්ත ප්රහාරය වළක්වා ගැනීමට ඉඩ තිබූ බවය.
එදා වව්නතිවු ඝාතනය සම්බන්ධයෙන් සිදු වූ විමර්ශන හිතාමතාම නොමඟ යවා ඇති බවත්, එය කුමන්ත්රණයක ප්රතිඵලයක්ද යන්න පිළිබඳව වත්මන් රජය පුළුල් විමර්ශනයක් ආරම්භ කර ඇති බවත් අමාත්යවරයා සඳහන් කළේය.
එවකට පැවති රජය යටතේ මෙම ඝාතනය එල්.ටී.ටී.ඊ. හිටපු සාමාජිකයන් විසින් සිදු කළ බවට පෙන්වා දෙමින් කන්නමොහොත් අජන්තන් සහ රාසනායකම් සර්වනාදන් යන අය අත්අඩංගුවට ගෙන සිරගත කර තිබූ බව අමාත්යවරයා පැහැදිලි කළේය. නමුත් සැබෑ ලෙසම මෙම ඝාතනය සිදු කර ඇත්තේ සහරාන් හෂීම්ගේ කණ්ඩායම විසින් බව මේ වන විට හෙළි වී ඇතැයි ඔහු පැවසීය. සහරාන් ඇතුළු පිරිස මෙම සිද්ධියෙන් මුදවා හැරීම සඳහා විමර්ශන නිලධාරීන් කටයුතු කර ඇති බවත්, එය හිතාමතාම විමර්ශන නොමඟ යැවීමක් බවත් අමාත්යවරයා වැඩිදුරටත් අවධාරණය කළේය.
වව්නතිවු ඝාතන විමර්ශනයට බාධා කිරීම සහ නොමඟ යැවීම සම්බන්ධයෙන් ත්රස්තවාදය වැළැක්වීමේ පනත යටතේ සැකකරුවන් දෙදෙනෙකු අත්අඩංගුවට ගෙන දැනට රක්ෂිත බන්ධනාගාරගත කර ඇති බව ඇමතිවරයා සභාවට දැනුම් දුන්නේය. මෙලෙස අත්අඩංගුවට ගෙන ඇත්තේ කාත්තංකුඩි ප්රදේශයේ පදිංචි ජසීල් බාවා ජෙගීල් පාස් සහ ලහුගල පදිංචි සුවඳරාල සුදුිලේගේ සරත් සමන්ත යන අයයි.
මොහොමඩ් සාරිෆ් ආදම් ලෙබ්බේ හෙවත් 'ගපූර් මාමා' නැමැති සැකකරුගෙන් කළ ප්රශ්න කිරීම්වලදී මියගිය නිලධාරීන් සතු වූ රිවෝල්වර දෙක සහ තවත් ආයුධ සොයා ගැනීමට හැකි වූ බව අමාත්යවරයා හෙළි කළේය. ඉන් එක් රිවෝල්වරයක් නින්තවුර් ප්රදේශයෙන් ද, අනෙක් රිවෝල්වරය සහ පිහි දෙකක් වනාතවිල්ලුව ප්රදේශයෙන් ද සොයාගෙන ඇත.
එදා මෙම විමර්ශන නිසි මඟට යොමු කළේ නම් සහරාන් ඇතුළු කණ්ඩායම අත්අඩංගුවට ගැනීමට අවස්ථාව තිබූ බවත්, එසේ වූයේ නම් 2019 අප්රේල් 21 වනදා සිදු වූ විනාශකාරී පාස්කු ප්රහාරය වළක්වා ගැනීමට ඉඩ තිබූ බවත් අමාත්ය ආනන්ද විජේපාල මහතා වැඩිදුරටත් පවසා සිටියේය
