සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
මහා භාණ්ඩාගාරය සතු ඇමෙරිකානු ඩොලර් මිලියන 2.5ක මුදලක් කිසියම් පාර්ශවයක් අතට පත්වීම සම්බන්ධයෙන් විපක්ෂය ඉල්ලා සිටි පාර්ලිමේන්තු විවාදය ලබාදීම රජය ප්රතික්ෂේප කර ඇත.
රජයේ මෙම තීරණයත් සමඟ මුදල් අමාත්යවරයාට එරෙහිව විශ්වාසභංග යෝජනාවක් ගෙන ඒමට විපක්ෂය මේ වන විට සැලසුම් කරමින් සිටින බව දේශපාලන ආරංචි මාර්ග සඳහන් කරයි.
ඉදිරි පාර්ලිමේන්තු සතියේ කටයුතු තීරණය කිරීම සඳහා පාර්ලිමේන්තු සංකීර්ණයේදී පක්ෂ නායක රැස්වීමක් පැවැත්විණි.
එහිදී මෙම ඩොලර් මිලියන 2.5ක අතුරුදන් වීම පිළිබඳව එක්දින විවාදයක් ලබාදෙන ලෙස විපක්ෂය දිගින් දිගටම ඉල්ලා සිටියද, ආණ්ඩු පක්ෂය එය එකහෙළාම ප්රතික්ෂේප කර තිබේ.
මේ සම්බන්ධයෙන් අදහස් දැක්වූ විපක්ෂයේ ප්රධාන සංවිධායක ගයන්ත කරුණාතිලක මහතා ප්රකාශ කළේ, මහජන මුදල් සම්බන්ධයෙන් පැන නැගී ඇති මෙම බරපතළ ගැටලුව පිළිබඳ විවාදයක් ලබා දීමට රජය බියක් දක්වන බවයි.
"මහා භාණ්ඩාගාරයේ ඩොලර් මිලියන 2.5ක් වැනි විශාල මුදලකට සිදුවූ දෙයක් ගැන රටට හෙළි කළ යුතුයි. ඒ සම්බන්ධයෙන් විවාදයක් ඉල්ලුවත් ආණ්ඩු පක්ෂය එය දිගින් දිගටම ප්රතික්ෂේප කළා."
රජය මෙම විවාදය මගහැරීම හේතුවෙන් ඊට එරෙහිව ගත යුතු දැඩි ක්රියාමාර්ග පිළිබඳව විපක්ෂයේ පක්ෂ නායකයන් සමඟ සාකච්ඡා කර තීරණය කරන බව කරුණාතිලක මහතා වැඩිදුරටත් පැවසීය.
ඒ අනුව, මෙම මූල්ය අක්රමිකතාවයට වගකිව යුතු මුදල් අමාත්යවරයාට එරෙහිව විශ්වාසභංග යෝජනාවක් ගෙන ඒම පිළිබඳව විපක්ෂයේ අවධානය යොමුව ඇති බව වාර්තා වේ.
රටේ පවතින ආර්ථික තත්ත්වය හමුවේ මෙවැනි මූල්ය ගනුදෙනු පිළිබඳව විනිවිදභාවයක් තිබිය යුතු බවත්, පාර්ලිමේන්තුවට වගකීම මඟහැරීමට රජයට ඉඩ දිය නොහැකි බවත් විපක්ෂය අවධාරණය කරයි.
