සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
එහිදී වැඩිදුරටත් අදහස් දැක්වූ ටිල්වින් සිල්වා මහතා පවසා සිටියේ, පක්ෂ අනාථ වී විසිරී සිටින සුළු පිරිසක් එක්ව හන්දිගානේ කෑගැසූ පමණින් මෙම ආණ්ඩුව පෙරළිය නොහැකි බවයි.
"වෙන ආණ්ඩු මීට පස්සේ නෑ කියන එක අපි ඕගොල්ලන්ට කියන්න ඕන. මේ රට හදනකම් රට හදන්න ඉන්නේ මාලිමාවේ ආණ්ඩුව, ජාතික ජන බලවේගයේ ආණ්ඩුව විතරයි" යනුවෙන් හෙතෙම එහිදී ප්රකාශ කළේය.
ආණ්ඩුව පෙරළීමට හෝ අරගල කිරීමට උත්සාහ කරන පිරිස්වලට පිළිතුරු දෙමින් ලේකම්වරයා පැවසුවේ, අරගල පිළිබඳ ඉගෙන ගැනීමට අවශ්ය නම් එය ඉගෙන ගත යුත්තේ තමන්ගෙන් බවයි.
මෙම ආණ්ඩුවට අත තැබීමට කිසිවෙකුට ඉඩ නොදෙන බවත්, ආණ්ඩුව ආරක්ෂා කිරීම සඳහා කළුතරට රැස්ව සිටින්නේ දැවැන්ත "ජන පවුරක්" බවත් ඔහු පෙන්වා දුන්නේය.
"මේ රටේ ජනතාව තමන් හදාගත්තු ආණ්ඩුවට ඒවා මේවා කරන්න කාටවත් ඉඩ දෙන්නේ නැහැ" යැයිද ඔහු වැඩිදුරටත් සඳහන් කළේය.
අතීතයේ කම්කරු පන්තියේ අයිතිවාසිකම් කප්පාදු කළ සහ ජනතාවට පීඩා කළ පාලකයින් අද වන විට ඉතිහාසයේ කුණු කූඩයට වැටී ඇති බවත්, ඔවුන්ට මැයි දිනයක් පවා පවත්වා ගැනීමට නොහැකි වී ඇති බවත් ටිල්වින් සිල්වා මහතා මෙහිදී ප්රකාශ කළේය.
ඇතැම් පක්ෂ මැයි දිනය වෙනුවට සිල් සමාදන් වීම් සහ දන්සල් දීම් වැනි කටයුතුවල නිරත වන බව උපහාසයෙන් යුතුව සිහිපත් කළ ඒ මහතා, කොළඹ පවත්වන සියලුම රැලි එකතු කළත් කළුතර රැස්වීමේ සිටින ජනතාවගෙන් භාගයක්වත් නොමැති බවට අභියෝග කළේය.
