ඇතැම් මාධ්‍යවල පළවී ඇති පුවත් පරිදි මැයි 11 වනදායින් මෙරට කොරෝනා වෛරස් ව්‍යාප්තිය අවසන් වන බවට ප්‍රකාශයක් තමන් නිකුත් නොකළ බව සෞඛ්‍ය සේවා අධ්‍යක්ෂ ජනරාල් අනිල් ජාසිංහ මහතා පවසයි.
"මැයි 11 වෙනකොට කොවිඩ් 19 අවසන් කියලා එහෙම ප්‍රකාශ නම් මම ලබාදීලා නෑ. මම දන්නෑ කොහොමද මාධ්‍ය වාර්තා පළවෙලා තියෙන්නෙ කියලා. නමුත් අපි බලාපොරොත්තු වෙනවා නාවික හමුදාවේ මේ ගැටළුව නිසා තමයි ඇත්ත වශයෙන්ම නැවත මේ සංඛ්‍යාව උඩ ගියේ.
ඒ නාවික හමුදා සෙබළුන් ඉඳපු ප්‍රදේශවල යම්කිසි ආකාරයකට පොකුරු එන්නෙ නැත්නම් අපට මේ සංඛ්‍යාවල අඩුවීමක් පෙන්නුම් කරයි අනිවාර්යයෙන්. ඒක රඳා පවතින්නෙ මේ නාවික භටයින් ගිය ප්‍රදේශවල ඇතිවෙන තත්වය අනුව. එය තමයි මම ප්‍රකාශ කරන්නේ" යනුවෙනුයි ඒ මහතා සඳහන් කළේ.
එසේම සමාජය තුළින් රෝගීන් හමුවීම බිංදුවක් වී ඇතැයි පැවසිය හැකිද යන ප්‍රශ්නයට ඒ මහතා පිළිතුරු දුන්නේ පහත ආකාරයෙනි.
"කොමියුනිටි එකෙන්, සමාජයෙන් හම්බෙන සංඛ්‍යාව බිංදුව කියලා කියන්න බෑ. සුළු සංඛ්‍යා ලැබෙනවා. දැන් උදාහරණයක් හැටියට දාබරේ මාවතෙන් පෙරේදා දෙකක් හම්බුණා. මේවා සමාජයේ අය. ඒවගේ ඉතාම අඩු සංඛ්‍යා ලැබෙමින් පවතිනවා. නමුත් ඒවා ඉතාමත්ම ඉක්මනින්ම කවුද, කොහෙද, කොහොමද, කාගෙන්ද බෝවුණේ කියන කාරණා අපට හඳුනාගන්න පුළුවන්"
කෙසේවෙතත් කොරෝනා මර්දනය සඳහා මෙතෙක් ගෙන ඇති පියවර අනුව සමස්තයක් ලෙස තත්වය කෙරෙහි සුබවාදීව, ධනාත්මකව බැලීමට හැකි බවත් ඒ මහතා අවධාරණය කළේය.
