නාවික හමුදා සෙබලෙකුගේ ගිනි අවියක් උදුරා ගැනීමට තැත් කිරීමේ සිදුවිමක් කොළඹ, මාළිගාවත්ත ප්‍රදේශයෙන් ඊයේ (30) වාර්තා වුණා.
රජය විසින් ජනතාවට ලබාදෙන රුපියල් 5000 ආධාරය බෙදා දීමේ වැඩපිලිවලක් ඊයේ දිනයේදී මාලිගාවත්ත ප්‍රදේශයේදී නාවික හමුදාව විසින් සිදුකර තිබෙනවා.
එම අවස්ථාවේදී එම රුපියල් 5000 ආධාරය ලබා ගැනීමට පැමිණි පිරිස අතරේ සිටි එක් පුද්ගලයෙක් එම ස්ථානයේ පනවා තිබු සමාජ දුරස්ථභාවය පවත්වා ගෙන යාමේ පෝලිමට එපිටින් පැමිණීමට උත්සහ කිරීමේදී එහි රාජකාරියේ නිරතව සිටි නාවික හමුදා සෙබලෙකු එය වැලක්වීමට උත්සහ දරා තිබෙනවා.
එම අවස්ථාවේදී ගිනි අවිය ක්‍රියාත්මක වී වෙඩි ප්‍රහාර කිහිපයක් පොලොවට එල්ලවී තිබෙනවා. එම සිද්ධියෙන් කිසිවෙකුත් තුවාල ලබා නොමැති අතර රාජකාරියට බාධා කිරීමේ චෝදනා මත අදාල සැකකරු අත්අඩංගුවට ගෙන ඇත.
මෙලෙස අත්අඩංගුවට ගෙන ඇති පුද්ගලයා මත්ද්‍රව්‍ය භාවිතයට ඇබ්බැහි වුවෙක් බවට හෙළිව ඇත.
මේ සිද්ධිය සම්බන්ධයෙන් සිදුකළ විමසීමකදී නාවික හමුදාවේ මාධ්‍ය ප්‍රකාශක ලුතිනන් කමාන්ඩර් ඉසුරු සුරියබණ්ඩාර සඳහන් කලේ සිද්ධිය සම්බන්ධව මාළිගාවත්ත පොලිසිය විසින් විමර්ශන සිදුකරන බවයි.
