මහජන ආරක්ෂාව, නීතිය හා සාමය පිළිබඳ පැවැති මාධ්‍ය හමුවක දී වැඩිදුරටත් කරුණු දැක්වූ පාඨලී චම්පික රණවක මහතා;
“මේ ජනවාරි පළවෙනිදා සිට, මේ දක්වා කාලය තුළ, වෙඩි තැබීම් 28 කින් 22 දෙනෙක් මිය ගිහින් තිබෙනවා. මෙයින් 18 දෙනෙක් ම සංවිධානාත්මක අපරාධ කල්ලි විසින් කරන ලද ඝාතන බව පෙනීගිහින් තියෙන බව පොලීසියම ප්‍රකාශ කරනවා. මේක ඉතාම බරපතල තත්ත්වයක්.”
පොලිස්පතිවරයා රිමාන්ඩ් බන්ධනාගාර ගත කිරීම සහ වැඩබලන පොලිස්පතිවරයා සහ ජ්‍යෙෂ්ඨ නිලධාරීන් අතර පවතින ගැටුම් හේතුවෙන් පොලිසිය හිසක් නැති කවන්ධයක් බවට පත්ව ඇතැයි ඔහු චෝදනා කරයි.
“රටට පොලිස්පතිවරයෙක් නැහැ. වැඩ බලන පොලිස්පතිවරයෙක් ඉන්නේ. පොලිසියේ නායකයා පොලිසිය විසින්ම අත්අඩංගුවට අරගෙන හිරේ දාලා තියෙනවා. ඉතින් මේ වගේ තත්ත්වයක් තුළ පොලිසිය හිසක් නැති කවන්ධයක් බවට පත්වෙලා තියෙනවා විතරක් නෙවෙයි පොලීසියේ පසුගිය කාලයේ කටයුතු කරද්දී විවිධාකාරයේ හිටපු දූෂිත කණ්ඩායම් අපට පේනවා අද වෙනස් ආකාරයකට පෙළගැහෙමින් මේ ආණ්ඩුවේ ක්‍රියාකාරීත්වයත් එක්ක තමන්ගේ පැවැත්ම තනා ගැනීමට කටයුතු කරමින් සිටිනවා.”
පොලිස් කොමිසමේ ස්වාධීනත්වයට රජය දැඩි ලෙස බලපෑම් කරන බවත්, පොලිස් නිලධාරීන් 130 කට අධික සංඛ්‍යාවක් කිසිදු හේතුවක් නොමැතිව ස්ථාන මාරු කිරීම දේශපාලන පළිගැනීමක් බවත් රණවක මහතාගේ අදහස වී තිබේ.
“පසුගිය ජනාධිපතිවරණයේදී මැතිවරණ කොමිසමේ නියෝග මත ජාතික ජන බලවේගයේ පෝස්ටර් ඉරුවයි කියලා පොලිස් නිලධාරීන් මාරු කරනවා නම්, ඒක ඉතාමත්ම බරපතල ප්‍රශ්නයක්. ඒක නම් මේ කරගෙන යන්නේ පොලිස් නිලධාරීන් අතරේ පොලිසිය දේශපාලනකරණය කිරීම. මේ උත්සාහය පොලිසිය තමන්ගේ පක්ෂයේ පොලිසියක් බවට පත් කිරීම.”
ජනාධිපතිවරයාගේ සමීපතමයන්ට නීතිය ක්‍රියාත්මක නොවීම සහ චපල ප්‍රතිපත්ති හේතුවෙන් රටේ නීතියේ ආධිපත්‍ය බිඳ වැටී ඇති බවත්, ජනතාව නීතිය අතට ගැනීමට පෙළඹී ඇති බවත් ඔහු වැඩිදුරටත් චෝදනා කළේය.
“නීතියට ඉහළින් ජනාධිපති විතරයි ඉන්නේ. මුක්තිය තියෙන සහය ජනාධිපතිලා මේ ආණ්ඩුවේ තියෙන්න විදිහක් නැහැ. සමහර අයව අත්අඩංගුවට ගන්න බැහැ. සී අයි ඩී යට ගෙනියන්න බැහැ. රජය චපල ප්‍රතිපත්තියක් අනුගමනය කරනවා. නීතියට ඉහළින් කිසිම කෙනෙක් පවත්වාගෙන යාම තබා ගැනීම, සම ජනාධිපතිවරුන් හැටියට ඇතැම් ජාවාරම්කාරයින්ට ඉන්න ඉඩදීම සහමුලින්ම නතර කළ යුතුයි. නීතිය සැමට ක්‍රියාත්මක වෙන තත්වයක් ඇති කළ යුතුයි.”
පොලිස්පතිවරයා වහාම ඉවත් කර නව පොලිස්පතිවරයෙකු පත් කරන ලෙසත්, පොලිස් කොමිසමේ ස්වාධීනත්වය ආරක්ෂා කරන ලෙසත්, දේශපාලන මාරු කිරීම් නවතා පොලිසියේ කාර්යසාධනය වැඩි දියුණු කරන ලෙසත් රජයෙන් රණවක මහතා ඉල්ලා සිටියේය. සංවිධානාත්මක අපරාධ කල්ලි නීතිය යටතට ගෙන මහජනතාවගේ ආරක්ෂාව සහතික කරන ලෙස ද ඔහු ඉල්ලා සිටියේය.
මෙම මාධ්‍ය හමුවට එක් වූ එක්සත් ජනරජ පෙරමුණේ උපසභාපති තීක්ෂණ ගම්මන්පිල මහතා;
“අද ඔබ සියලු දෙනා දන්නවා රටේ තැන තැන වෙඩි තැබීම් සිද්ධ වෙනවා. මහජනයාගේ ආරක්ෂාව සම්බන්ධයෙන් රටේ පුරවැසියන් හැමෝටම අද වෙද්දි ප්‍රශ්නයක් ඇතිවෙලා තිබෙනවා. මේ ගැන විමසා බලද්දී සමහර මහජනයාගේ අදහස තමයි දැන් රට අනාරක්ෂිත ද, අපිට පාරේ බැහැලා යන්න බැරි ද කියන තත්ත්වයට පත්වෙලා තියෙනවා කියලා. අපි මතක් කරන්න කැමතියි. ඒත් එක්කම මහජන ආරක්ෂාවේ ප්‍රමුඛ කාර්යභාරයක් කරන අපේ පොලිසිය, ශ්‍රී ලංකා පොලිසිය අභ්‍යන්තරයේත් මේ වෙද්දි ජනතාවට දැනෙන්නේ නැති වුණාට, කිසිම විධිමත් වැඩපිළිවෙලක් නැතුව යම් යම් වෙනස්වීම් කරනවා. යම් යම් තීරණ තීන්දු තීරණ ගන්නවා. මේ හින්දත් මේ බලපෑමක් ඇතිවෙලා තියෙන කියන කාරණාව සමාජගත වෙලා තියෙනවා.”
මෙවර පළාත් පාලන මැතිවරණයේ එක්සත් ජනරජ පෙරමුණේ ‘පැන්සල’ ලකුණ යටතේ තරග වදින බොරැල්ල සංවිධායක කිංස්ලි පෙරේරා, පක්ෂ ක්‍රියාකාරීන් වන නන්දන ලාල් බාලසූරිය, දුමින්දිකා තිරාණගම යන මහත්ම මහත්මීන් ද මෙම මාධ්‍ය හමුව සඳහා එක් ව සිටිය හ.
– Media unit
