සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
මෙරට ඉන්ධන මිල ඉහළ යාමට බලපෑවේ හුදෙක් ලෝක වෙළඳපොළේ මිල ඉහළ යාම පමණක් නොවන බවත්, රට තුළ ඉන්ධන හිඟයකින් තොරව අඛණ්ඩ සැපයුමක් පවත්වාගෙන යාම රජයේ මූලික අරමුණ වූ බවත් ජාතික ජන බලවේගයේ පාර්ලිමේන්තු මන්ත්රීනී ලක්මාලි හේමචන්ද්ර මහත්මිය පවසයි.
දෙරණ වාදපිටිය වැඩසටහනට එක්වෙමින් ඇය මේ බව සඳහන් කළාය.
ඉන්ධන මිල ඉහළ දැමීමට සිදුවූ අවස්ථාවේදී ජනාධිපතිවරයා ඒ පිළිබඳව ඉතා පැහැදිලිව කරුණු ඉදිරිපත් කළ බව සිහිපත් කළ මන්ත්රීවරිය, මිල තීරණය කිරීමේදී ලෝක වෙළඳපොළේ බොරතෙල් මිලට අමතරව තවත් සාධක කිහිපයක් බලපෑ බව පෙන්වා දුන්නාය.
"ලෝක වෙළඳපොළේ මිල වැඩිවීමට අමතරව, නැව් ගාස්තු, රක්ෂණ ගාස්තු සහ ප්රිමියම් ගාස්තු එකවරම ඉහළ යාම නිසා විශාල අර්බුදයක් මතු වුණා. ලෝක වෙළඳපොළේ මිල සියයට සියයකින් (100%) වැඩි වෙද්දී, අපි ලංකාවේ මිල වැඩි කළේ සියයට හතළිහකින් (40%) වැනි අඩු මට්ටමකින්. ජනතාවට දරාගත හැකි මට්ටමක මිල පවත්වා ගැනීමට රජය උපරිම උත්සාහයක් ගත්තා" යැයි ඇය පැවසුවාය.
වත්මන් රජයේ ඇමතිවරුන් හෝ මන්ත්රීවරුන් දේශපාලනය තුළ කිසිදු ව්යාපාරික කටයුත්තක නිරත නොවන බව අවධාරණය කළ හේමචන්ද්ර මහත්මිය, පවතින අර්බුදය හමුවේ කිසිදු පාර්ශවයක් අයුතු ලාභ ලැබීමට කටයුතු නොකරන බව ද සඳහන් කළාය.
"අපි දේශපාලනය ඇතුළේ බිස්නස් කරන්නේ නැහැ. ඒ නිසා ලෝක වෙළඳපොළේ මිල අඩු වන සෑම අවස්ථාවකදීම එහි වාසිය සෘජුවම ජනතාවට ලබාදීමට අපි කටයුතු කරනවා" යනුවෙන් ඇය වැඩිදුරටත් කියා සිටියාය.
ඉන්ධන මිල සූත්රය සහ මිල තීරණය කිරීමේ ක්රියාවලිය පිළිබඳව ජනතාව තුළ කිසිදු සැකයක් ඇති කරගත යුතු නොවන බවත්, රජය ඉතා විනිවිදභාවයකින් යුතුව මෙම කටයුතු මෙහෙයවන බවත් මන්ත්රීවරිය මෙහිදී අවධාරණය කළාය.
