සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
වත්මන් රජය යටතේ මෙරට දේශපාලන සංස්කෘතියේ ගුණාත්මක වෙනසක් සිදු කර ඇති බවත්, ජනාධිපතිවරයා හෝ අගමැතිවරයා ඇතුළු කිසිදු දේශපාලනඥයෙකු නීතියට ඉහළින් නොසිටින බවත් කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතා පවසයි.
ජාතික ජන බලවේගය විසින් සංවිධානය කරන ලද ජන හමුවකට එක්වෙමින් ඒ මහතා මේ බව සඳහන් කළේය.
අමාත්යවරයා එහිදී වැඩිදුරටත් පෙන්වා දුන්නේ අතීතයේ මෙන් දේශපාලනඥයන්ට රාජ්ය නිලධාරීන් බිය ගැන්වීමට හෝ අධිකරණ ක්රියාවලියට බලපෑම් කිරීමට දැන් අවස්ථාවක් නොමැති බවයි.
පාතාල කල්ලි සාමාජිකයන් සහ මත්ද්රව්ය ජාවාරම්කරුවන් ද ඇතුළුව සෑම අයෙකුම නීතියට යටත් විය යුතු බව ඔහු අවධාරණය කළේය.
"අතීතයේ දේශපාලනඥයන් සහ පාතාලය අතර තිබූ සමීප සබඳතා අද වන විට අනාවරණය වෙමින් පවතිනවා. එදා අප බලයට පත්වුවහොත් රට බංකොලොත් වන බවත්, ජනතාව සාගින්නෙන් මියයන බවත් පැවසූ විපක්ෂයට අද සිදුව ඇත්තේ භාණ්ඩාගාරය පිරී පවතින්නේ ඇයිදැයි ප්රශ්න කිරීමටයි. එයම අපේ ආර්ථික කළමනාකරණයේ සාර්ථකත්වය පෙන්වන සාක්ෂියක්," යැයි අමාත්යවරයා පැවසීය.
රජය විසින් හඳුන්වා දී ඇති නව දේශපාලන ප්රතිසංස්කරණ පිළිබඳව අදහස් දක්වමින් ඔහු කියා සිටියේ මන්ත්රීවරුන් සඳහා ලබා දුන් වාහන බලපත්ර සහ විශ්රාම වැටුප් ක්රමය සම්පූර්ණයෙන්ම අහෝසි කර ඇති බවයි. මෙය අතීත, වර්තමාන සහ අනාගත මන්ත්රීවරුන් සැමටම පොදු තීරණයක් බවද ඔහු සඳහන් කළේය.
එමෙන්ම, රජයේ නිල නිවාස පරිහරණය සම්බන්ධයෙන්ද දැඩි විනයක් පවත්වාගෙන යන බව පැවසූ හඳුන්නෙත්ති මහතා, අරලියගහ මන්දිරයේ ප්රධාන ශාලාව පවා දැන් පෞද්ගලික හෝ රාජ්ය අංශයේ උත්සව සඳහා නියමිත ගාස්තු ගෙවා ලබාගත හැකි බවත්, කිසිවෙකුට එය නොමිලේ ලබා නොදෙන බවත් පැවසීය.
අග්රාමාත්ය හරිනි අමරසූරිය මෙනවිය පවා සිය පෞද්ගලික නිවසේ සිට රාජකාරි කටයුතු සිදු කරන බව ඔහු මෙහිදී සිහිපත් කළේය.
මෙම ගුණාත්මක වෙනස කිසිවෙකුට ආපසු හැරවිය නොහැකි බවත්, ජාතික ජන බලවේගය විසින් ඇති කළ මෙම දේශපාලන ආදර්ශය රටේ අනාගතය වෙනුවෙන් තැබූ තීරණාත්මක පියවරක් බවත් අමාත්යවරයා වැඩිදුරටත් ප්රකාශ කළේය.
