කොවිඩ් 19 නිරෝධායන පනත ක්‍රියාවට නැංවීමේ පූර්ණ බලධාරියා වන සෞඛ්‍ය සේවා අධ්‍යක්ෂ ජනරාල්, විශේෂඥ වෛද්‍ය අනිල් ජාසිංහ සහ ජනාධිපති කාර්ය සාධක බළකායේ ප්‍රධානී ලුතිනන් ජෙනරාල් ශවේන්ද්‍ර සිල්වා අනුමැතිය ලබාදුනහොත් පාර්ලිමේන්තු මැතිවරණය මැයි මස අවසන් සතිය තුළ පැවැත්වීමේ සූදානමක් පවතින බව මැතිවරණ කොමිෂන් සභා ආරංචි මාර්ග සඳහන් කළා.
නාමයෝජනා භාරගෙන දැනට මැතිවරණ කොමිෂන් සභාවේ සභාපති මහින්ද දේශප්‍රිය විසින් කල්දමා ඇති පාර්ලිමේන්තු මැතිවරණය පැවැත්වීම සඳහා රට තුළ පවතින තත්ත්වය සමාලෝචනය කිරීමට සහ ඉදිරි ක්‍රියාමාර්ග පිළිබඳ පුළුල් සාකච්ඡාවක් පැවැත්වීමට මැතිවරණ කොමිෂන් සභාව සැරසෙනවා.
කොවිඩ් _ 19 නිරෝධායන පනත ක්‍රියාවට නැංවීමේ පූර්ණ බලධාරියා වන සෞඛ්‍ය සේවා අධ්‍යක්ෂ ජනරාල් අනිල් ජාසිංහ ඇතුළු සෞඛ්‍ය අමාත්‍යාංශයේ ජේ‍යෂ්ඨ නිලධාරීන් පිරිසක් ලබන 20 වැනි සඳුදා මේ සම්බන්ධයෙන් පැවැත්වෙන සාච්ඡාවට කැඳවා ඇති බවද දැනගන්නට තිබෙනවා..
කොවිඩ් _ 19 ජනාධිපති කාර්ය සාධක බළකායේ ප්‍රධානී ලුතිනන් ජෙනරාල් ශවේන්ද්‍ර සිල්වා, වැඩබලන පොලිස්පති සී.ඩී. වික්‍රමරත්න, නියෝජ්‍ය පොලිස්පති ප්‍රියන්ත වීරසූරිය, තැපැල්පති රංජිත් ආරියරත්න යන මහත්වරු ඇතුළු පිරිසක් මැතිවරණ කොමිෂන් සභාව විසින් මෙම සාකච්ඡාවට කැඳවා ඇති බව වාර්තා වනවා.
පාර්ලිමේන්තු ඡන්ද විමසීම, මැයි මස අග සතිය තුළ පැවැත්වීමට නම් මෙම මස 20 වැනිදා සිට සති පහක කාලයක් අවශ්‍ය වන බව මැතිවරණ කොමිෂන් සභා කාර්යාලයේ ජේ‍යෂ්ඨ නිලධාරියෙක් සඳහන් කළා.
කොවිඩ් 19 වයිරසයට ගොදුරු වී සිටින දකුණු කොරියාවද, එරට ඡන්දය පැවැත්වූ බැවින් ශ්‍රී ලංකාවේද මැතිවරණය පැවැත්වීමට හැකිවන තත්ත්වයක් නිර්මාණය වෙමින් පවතින බවට දේශපාලන විචාරකයන් පෙන්වාදී ඇති බවද දැනගන්නට ලැබෙනවා.
