අවදානම් කාලසීමාව පසුකරමින් සිටියද මේ වනතුරුත් ශ්‍රී ලංකාව කොරෝනා වෛරසය සමාජයට සම්ප්‍රේෂණය වීමේ තත්ත්වයකට පැමිණ නොමැති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ පවසනවා.
ආසාදිතයන් හඳුනා ගැනීම සඳහා බුද්ධි අංශ සහ සෞඛ්‍ය අංශ අනුගමනය කළ අඛණ්ඩ ක්‍රියාමාර්ග සහ මුල් අවස්ථාවේ සිට ආසාදිතයන් වෙන්කොට ප්‍රතිකාර කිරීම මෙන්ම සාර්ථක නිරෝධායන වැඩපිලිවෙල ඊට හේතු වූ බවයි සෞඛ්‍ය සේවා අධ්‍යක්ෂ ජනරාල්වරයා වැඩිදුරටත් කියා සිටියේ.
කොරෝනා ආසාදිත රෝගියෙකු ගුණසිංහපුර ප්‍රදේශයෙන් වාර්තා වීමත් සමඟ ඔහු සමඟ සම්බන්ධ වූ පුද්ගලයන් 300 දෙනෙකු පමණ පිරිසක් මේ වනවිට වේල්ලවීදිය පොලිස් ස්ථානය ආසන්නයේ ස්ථානයක හුදෙකලා කර තිබෙනවා.
එලෙස වෙන්කර සිටි පිරිස අතර පුද්ගලයින් දෙදෙනෙකු කොරෝනා බවට සැක සහිත රෝග ලක්ෂණ පෙන්නුම් කිරීම හේතුවෙන් ඊයේ රෝහල් ගතකර ඇති අතර, ඉන් එක් අයෙකු කොළඹ ජාතික රෝහලෙන් පළාගොස් ඇති බවයි මැදකොළඹ සෞඛ්‍ය වෛද්‍ය නිලධාරී ඩබ්ලිව්.කේ. චන්ද්‍රපාල සඳහන් කළේ.
බණ්ඩාරනායක මාවත ප්‍රදේශයෙන් සොයාගත් කොරෝනා ආසාදිත කාන්තාවගේ පවුලේ සියලූ දෙනා මේ වනවිට PCR පරීක්ෂාවට ලක් කර ඇති අතර, ඇයගේ ස්වාමි පුරුෂයාට සහ පුතුන් දෙදෙනෙකුට එම වෛරසය ආසාදනය වී නොමැති බව ඉන් තහවුරු වී තිබෙනවා.
කෙසේ වෙතත්, බාල පුත්‍රයාගේ වාර්තාව මේ දක්වා ලැබී නැහැ. එමෙන්ම, ඇය සමඟ සමීප සබඳතා පැවැත් වූ 16 දෙනෙකු නාවික හමුදාව මගින් නිරෝධායනය සඳහා යොමුකිරීමට පියවර ගත් බවයි මැදකොළඹ සෞඛ්‍ය වෛද්‍ය නිලධාරී ඩබ්ලිව්.කේ. චන්ද්‍රපාල සඳහන් කළේ.
